Shillong, Jymmang 01 : Ha ka jingjia kaba ishyrkhei ba jia hynnin ka janmiet sngi Ba-ar, ka jingtwa khyndew kaba jur bha kala jia hajan ka Tunnel Sonapur sha ka liang ka Meghalaya bad ha kane ka jingjia, uwei u nongniah trok bad u nongbud kila shu lait im salit hadien ba ka kali kala shah rat ha u diengbah bad ka khyndew.
Ki briew ba sakhi, kila pyntip ba kane ka jingjia kala jia ha ka surok na Lumshnong sha Ratacherra ha kaba u diengbah ula khyllem ban tyllun ha ryngkat ka khyndew sha ka surok Highway bad leit sangah ia ka trok ba dang iaid.
Ka jingjam ka jingshah rat kala pynlong ia kane ka kali ban shah kyndang hynrei donbok ba u nongniah bad u nongbud kila lait im bad ioh mih napoh ka kali khlem kano kano ka jingmynsaw.
Kane ka jingtwa khyndew kala pynsangeh syndon ia ka jingiaid jong ki kali ha kane ka surok National Highway ha kaba bun ki kali kila sahkut ha baroh arliang jong ka Tunnel Sonapur.
Ki bor khmih kila leit ban pynkhuid ia ka khyndew bad weng ia une u dieng na ka surok khnang ban lait noh ki kali ba kin iaid.
Ka Sonapur Tunnel, kaba dei lynti ba kongsan bha ba pyniasoh ia ka Barak Valley bad ka Guwahati, ka dei ka jaka kaba jur bha ka jingtwa khyndew ha man ka por lyiur.
