Shillong, Iaiong 06 : Ki rangbiria ka Hima Khyrim ki la rah ïa la ki nam lahduh ha ka lympung ïakob siat khnam ba la tip ïa kum ka Rongbiria Ki Hima Ka Ri Hynñiewtrep kaba 33, kaba la pynlong ha ka sngi Ïew Shyllong, kata ka 4 tarik u Ïaiong 2026, ha madan ïasiat ha Smit.
Kum ban shu pynkynmaw ba ka 4 tarik u Ïaiong, u snem 1829, kadei ka sngi ba hiar thma u Syiem Tirot Sing ka Hima Nongkhlaw ïa ki bor synshar Phareng.
Haba phai sha ka jingïakhun, ha ka ïakob siat kaba para marwei, la mih madan haduh 281 ngut ki rangbiria, ha kaba ka nam lahduh ka leit sha u Shailangstar Khongsngi ka Hima Khyrim, ha kaba u la ioh artad ban khur ïa ka song pisa kaba long 15,000.00 ryngkat bad u Nam Rupa, ba wan ba-ar dei u Nangpynbhalang Kharbyngar na Hima Khyrim ba la khur ïa ka song pisa kaba 7,000.00 bad ba wan ba-lai dei u Revistar Mawthoh na Hima Khyrim bad khur ïa ka song pisa kaba 3,000.00.
Ha ka ïakob siat kynhun la mih madan da 107 tyli ki kynhun ha kaba ka nam lahduh ka leit sha ki arngut ki rangbiria kata u Shaibingstar Khongsngi bad u Kobin Roy Khongsngi, ka Laitkyrhong A, Hima Khyrim, kaba la wan hadien ba ki la pynliem noh ïa ki arngut pat ki rangbiria ka Laitkyrhong AA, u Kestarwin Rynjah bad ïa u Bestarbok Nongkynrih.
Ka kynhun lahduh ha ka ïakob siat kynhun ki leit phai ïing ryngkat ka song pisa kaba long 35,000.00, bad ka Stieh Bor Manik Syiem kaba long ka nongkynti jong ka Committee, hynrei ka kynhun lah duh kan ïoh rah ei ïa ki Stieh Khun
Katba ka kynhun ba wan ba-ar ka ioh ïa ka song pisa kaba 15,000.00, katba ki kynhun kiba wan ba lai ki ïoh ban khur ïa ka song pisa kaba 5,000.00.
Ha ka por mynstep la wan ban plié ïa kane ka rongbiria da u Symbud Kongsan ba dei artad u Syiem Khynnah ka Hima Khyrim u Pa’em Habapan Sing Syiem bad la ïoh ïa ka jingkyntiew ïa ka lama ka Apphira Archery Committee (AAC) da u Rgh Wallamphang Roy ba dei u Chairman ka AAC, bad kumjuh ka jingkyntiew ïa ka lama ka Hima Khyrim da u Syiem Khynnah ka Hima Khyrim.
Hadien kane ka la don pat ka nguh ka dem, kaba la pyndep ïa ka da u Riew Tymmen Riewsan u Rgh Skor Jala, bad la bynrap da ka jingkren kaba la ai da u Rgh D.L Nongbri dkhot ka AAC.
Ha ka por janmiet, kongsan ba la wan ban sakhi lang da Pa’iem Dr Balajied Sing Syiem, Syiem ka Hima Khyrim.
Hadien ba la kut ka phainal la ïoh pat ban sam ïa ki khusnam sha ki rangbiria kiba la khur ïa la ki nam jop ki jong ki, ïa kaba la sam da u kongsan ryngkat ki kato katne ki riew pawkhmat.
