Shillong, Naitung 29 : Ka Sorkar Jylla kala rai ban plie noh ia ka jingiaid kali kumba ju long baroh shikatta na Jingkieng Umiam da kaba weng noh ia ka jingpyniaid kali ba shiliang shiliang.
Kane ka rai kala mih na ka jingialang jong ka High Powered Committee (HPC) bala pyniaid da u Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong, kaba long hynne ka sngi Nyngkong.
Haba pynbna ia kane, u Myntri ka Tnad Bording AT Mondal ula ong ba ia kane ka jingkieng yn sa plie noh bad iaid ki kali naduh lashai ka sngi Ba-ar.
Hynrei ula ong pat, tang ki kali kiba khia palat ia ka 4 metric ton yn dang teng ban khang ha kaban iaid na kane ka jingkieng. Ula ong, ban pyntreikam ia kane ka jingpyrrkhing, ka Tnad PWD kan sab uh ia ki jingker ban khang ia ki kali heh ba kin iaid.
Kane ka jingtei pynkhlain bad maramot ia ka Dam bad ka Jingkieng ba kot ka jinglut ba T.19 klur, kala nang pynjlan ia ka rta jong kane ka jingkieng sa kumba arphew snem, ong u Mondal.
Ula pyntip ba Sorkar kala shim ia ka rai ban plie noh hadien ka jingioh jingmynjur na ka IIT Guwahati, kaba pynthikna ba ka Jingkieng kala shngain ha kaban plie noh.
Ha kajuh ka por, u Mondal ula pyntip ba ka Sorkar kala pynkhamti ha ka National Highways and Infrastructure Development Corporation Limited (NHIDCL) ba kan wad bad pynithuh ia kiwei pat ki lynti iaid ban kiar ia ka Jingkieng.
Ula pynshai ruh ba ha kane ka jingpynbeit ba mynta, ka jingkhang ia ki Bos kamai ba kin iaid nalor ka jingkieng kan dang iai bteng beit. U ong ba ki bos kamai mynmiet kin hap ban ieng hashwa ban poi ka jingkieng bad ap ia ki briew kiba wan na shiliang ka jingkieng.
