Agartala, K’Lyngkot 04:U nongialam ba la rim ka CPI(M) uba la bat ruh haduh saw sien kynthih kum u Myntri Rangbah (CM) ka Tripura, u Manik Sarkar u don ia ka jingthmu ban ym iashim bynta ha kane ka assembly ilekshon 2023.
Haba kren halor kane ka jinglong jingman sha ki lad pathai khubor, u nongialam ka CPI(M) ula ong ba u Sarkar ula pyntip sha ki nongialam ka party halor kan ka jingshim rai ka jong u ban ym mihkhmat ia ka party ha kane ka assembly ilekshon ka ban sa long shen.
U Sarkar ula jop ia ka assembly ilekshon ha ka jylla da kaba pynrem noh ia ka Myntri ka sorkar pdeng ka Pratima Bhoumik na ka thain Dhanpur ba pawkhmat ka Tripura.
Na ka liang ka CPI(M) kala trei borbah ban ioh bat biang ia kito ki ktem kiba khlain ki jong ka ha Tripura, kumta ruh ban pynurlong ia kane ka donkam ban shim ia ki sienjam ba kyrpang.Nalor kata ka party kala sdang ruh ban iakren bad ki kynhun kiba pyrshah BJP na ka bynta ban thaw ia ka kynhun synrop.
Katkum ki nongialam ba hapoh jong ka party la ong ba ka party kala pynthymmai ha kaba iadei bad ki jingthmu ki jong ka na ka bynta kane ka ilekshon ka ban wan. “Kin don shibun ki riew thymmai ki ban ioh tiket.Ia ki kyrtong yn jied da kaba pynshong nongrim khamtam ha kaba iadei bad ki kyrdan pule, ka jingtbit ha ki kam sain hima sima bad ha ki jingtreikam hapoh ki kynhun.La khmih lynti ruh ba haduh kumba 60% na ki tiket yn ai sha ki kyrtong kiba thymmai.Lehse kane kan dei ruh ka sien kaba nyngkong ba kala don kaba kum kane ka jingkylla kaba khraw ha ki rukom treikam jong ka party,” ong u nongialam ka CPI(M) lyngba ka lad pathai khubor.
Ha kawei pat ka bynta ka liang pyrshah Congress bad ka Left Front ha Tripura ryngkat lang kila buh ka jingkyrpad ia ki paidbah nong thep vote ka jylla ba kin iatylli lang kawei pyrshah ia ka jingsynshar ba mutlop jong ka BJP bad ruh ban wan shakhmat na ka bynta ban pynkut noh ia ka jingsynshar jong ka BJP.
