Gangtok, K’Lyngkot 04 :U Myntri Rangbah (CM) ka Sikkim, u Prem Singh Tamang ula pynpaw ka jingsngewkhia kaba jur ha kaba iadei bad ka jinghiar arsut ha ka jingdon jong ki longkmie kiba ioh khunlung ha ka jylla.
U CM Tamang ula ong ba na ka liang ka sorkar jong u shen kan pynbna ia ki lad jingiarap pisa na ka bynta ki longkmie kiba kha palat arngut ki khun hadien ba na ka liang ka jong u ula shimkhia bha halor kane ka bynta.
Ka jingdon jong ki longkmie kiba ioh khunlung kala hiar arsut na ka 2.5 ha u snem 1999 sha kumba 1.1 ha u snem 2021, kaba la buh ruh ka jingma kaba khraw ia ki nongshong shnong ka Sikkim ba ki lah ban sa duhjait noh.
Hapoh ka shibnai yn sa pynmih ia ka jingpynbna halor kane ka bynta, ha kaba ki longkmie kiba dei ki nongtrei sorkar ha ka jylla kiba don palat arngut ki khun kin shah kyntiew ha ka liang ki jingsiew, katba kiwei pat ki longkmie nong Sikkim kin ioh da kiwei pat ki lad jingiarap pisa.
Haba kren sha ki lad pathai khubor u Tamang ula ong; “Kane kan pynkylla khongpong ia ka skhim kaba la pynbna kham hashwa, kata kaba kyntiew ia ki jingioh na ka bynta ki longkmie kiba trei hapoh ki tnat sorkar kiba don duna ia ka arngut ki khun kaba long ruh shibynta jong ka jingpynduna ha ka jingdon briew ne ka family planning.”
Nalor kata u Tamang ula pynpaw ruh ka jingsngew khuslai ba ka jingdon jong ki trai shnong nong Sikkim ki don ha ka jingma na ka jinglah ban shah tap ha kiwei pat ki briew kiba na shabar ha ki por ki snem ki ban wan lada kan long ha kane ka rukom.
Shuh shuh ula ong ban iarap ban pynkhieim pat ha kaba iadei bad ka jingkiew ha ka jingdon jong ki longkmie kiba ioh palat arngut ki khun na ka liang ka sorkar jylla kan pynjlan ha kaba iadei bad ka jingai shuti ia ki longkmie kiba dang shu ioh khun na ka shiteng snem sha ka shi snem bad ruh lehse ka jingiarap pisa kaba T.3 lak na ka bynta ki kynthei kiba don ka jingangnud ban pyndonkam da ka juk stad na ka bynta ban ioh khun, kata lyngba ka vitro preparation (IVF).
Kane ka jingshim rai ba la pynbna da u CM ka Sikkim ka la wan long ruh ha ka por ba kiwei pat ki jylla jong ka ri kum ka Assam bad ka Uttar Pradesh kiba la wanrah da ki kyndon ain ki ban ym pynshlur ban kha palat arngut ki khun.
