Nongpoh, Jymmang 21: Kawei ka trok kaba la kit palat pud ïa u rnga kala leit ban rat ïa u sainar elektrik hajan CMJ Breweries ha Rajabagan, Byrnihat, haduh ba uwei u post elektrik u la kdiah syndon ha surok bad bun kiwei ki post elektrik ba rit kila kyllon lang ha kaba bun ki shnong kila duh bording.
Kane ka jingjia ka la wanrah ruh ka jingdheng kali kaba jur bad baroh ki kali heh kim lait shuh ban leit ban wan lait noh ki kali rit.
Katkum ka jingtip bala ioh lum la ïathuh ba kane ka jingjia kala jia mynta ka step haka por kumba 7 baje eiei ha kaba katei ka trok kaba don ïa u Registration Number RJ 48 GA 5606 kaba la kit palat pud ïa u rnga kala leit ban rat beit ïa u sainar elektrik namar ka jingkynjang jong u rnga bala thep ha katei ka trok, haduh ba u post elektrik u la kdiah beit hapdeng surok.
Katto katne ki riew paidbah kila pyntip ruh ba ka jingkit palat pud jong ki trok kiba leit sha ki karkhana ha katei ka jaka kala long kaba palat, bad bunsien namar ka jingkynjang jong ki mar ba ki thep haka trok ki ju rah da u siej ïa utei u sainar u ba ïaid na shilliang sha shilliang utei u surok, bad dei ha kane ka kynti ba katei ka trok kit rnga kala rat syndon ïa u sainar haduh ban da kdiah ki post elektrik, bad haduh ban da thoh ïa kane ka khubor ym pat lah ban weng ïa ki post elektrik bala kyllon ha surok.
Pule lang ia kane: Iatehlok ka NEHU bad ka Gujarat University ban kyntiew ia ka rep ‘organic’ha Jylla
