Guwahati, Nailur 24: Ia ka jaka jngohkai ba pawkhmat hapoh Assam, ka Kaziranga National Park (KNP) lah ban plie biang na ka bynta ki nongwan shangkai pyrthei naduh ka 15 tarik u bnai Risaw u ban wan, kata hadien ba la khang khyrdep noh naduh u bnai Lber ba la dep namar ka aiom lyiur, ong ki bor ba dei khmih jong ka park.
Katba na ka liang u heh ba dei khmih jong kane ka jaka jngohkai ula ong ba ia ka tarik kim pat shym la pynskhem namar ka jinglong jingman ha ka mariang bad namar ka jingjur jong ka jinghap slap.Hynrei watla katta na ka liang ki bor ba dei khmih ki don ia ka jingplie ban plie noh ia kane ka jaka hadien jong katei ka 15 tarik.
Utei u heh ba dei khmih ula ong ruh ba ia ki dur mot jong ki laitylli ki Rhino la shna na u dpei jong ki reng ia kiba la thang ha ka snem 2021, kaba lah ruh ban khring shuh shuh ia ki nongwan shangkai pyrthei mynta ka snem.
“Ia kine ki dur mot yn pyndep noh tang hapoh ka shitaiew bad ngi kyrmen ba kine kin nang khring shuh shuh ia ki nongwan shangkai pyrthei ha kane ka jaka mynta ka snem,” ong shuh shuh utei u heh sorkar.
Kane ka park ka dei kaba khring ia ki shibun ki nongwan jngohkai napoh la ka jong ka ri bad na shabar kumjuh namar ka jingdon ia ki Rhino shireng kiba pawkhmat.
