Shillong, Iaiong 05: U Samla Evanshan Nongrum na ka Sacred Heart Boys Higher Secondary School uba la ioh ia ka kyrdan ka baar ha ka eksam SSLC 2025 ula ong, ba u kwah ban long kum u riewniam (Phadar) ha ka jingim ka jongu.
U Evanshan ula ong, “Ia mynta hi nga kwah ban leit pule ha ka Science Stream namar lada phi peit ia ka resol ruh, ngan leit pule ia ka Science Stream.
Haba kylli la u don kano kano ka jingpyrkhat ba un ioh ia ka kyrdan ka baar ha ka eksam SSLC, u Evanshan ula ong, “Nga shu pyrkhat bad ngan pyrshang kat kaba nga lah, ngam shim la poi pyrkhat ban ioh iaka resol kaba bha. Nga lah trei shitom bha bad nga dap da ka jingsngewkmen”.
“Ka jingjop ka jong nga kan leit sha u Blei uba la iada ia nga bad uba la ai ia ka met kaba koi tba khiah ban thoh iaka eksam bad kaei ka jinghikai kaba nga lah ioh na ki nonghikai nga la lah ban thoh ha ka eksam” ula ong.
Haba kylli la ka CM Impact Guide Book kala iarap ne ai jingmyntoi ha ka jingpynkhreh ia ka eksamin, une u samla ula ong, “Nga lah shu peit ia ka CM Impact Guide Book hynrei ngam shym la shaniah pat ia ka, katei ka kot ka long tang ban shu iarap bad kam dei pat kaba iarap ban poi sha ka kyrdan kaba shakhmat. Ngi donkam ban shaniah ha ki nonghikai bad ban don ruh ia ka jingskhem jingmut bad ka jingngeit ha u Blei”.
U Evanshan ula ong ruh, ba ym don satia ia ka Mobile Phone hynrei haba ym ioh ia ka lad ban ioh ia ka jingpynshai na ki nonghikai, kumta ula pyndonkam tang tang khyndiat khynsoit hi ia ka mobile phone.
“Nga la pynkhreh ialade da kaba pule kot 7 kynta ha ka shi sngi, hynrei ngam ju khreh kot pat man la ka sngi, hynrei haba nga khreh kot pat nga pynthikna ba nga dei ban khreh 7 kynta shi sngi, namar ka long kaba bha ia ka met jong nga hynrei ngi donkam ruh ban leh ia kiwei kiwei ki kam ruh” ula ong ha kaba iadei bad ka jingpynkhreh ia ka eksamin.
Haba kylli kaei kaba u kwah ban long hadien habud, u Evanshan ula ong, “Ia mynta, lada u Blei u i bit ia nga, nga kwah ban long u riewniam (phadar)”.
Ia ka kyrdan ka baar ha ka eksam SSLC la ioh da u Evanshan Nongrum na ka Sacred Heart Boys’ Higher Secondary School, Shillong bad ka Pori Panday na Jawaharlal Nehru Higher Secondary School, Phulbari kiba la ioh mar 578 marks.
 ha ka jingim ka jongu.){kind=link}