Nongstoiñ, Risaw 9: Ka ophis jong ka District Swachh Bharat Mission ha ka sngi saitjaiñ ka la ïoh ban rakhe ïa ka Swacch Bharat Diwas ha West Khasi Hills District Nongstoiñ, ïa kaba la tip ruh kum ka Swacchata Hi Seva. Ïa katei ka jingïalang la pynlong ha Bishop Hall Nongstoiñ.
Ha katei ka jingïalang la ïadonlang u bah D.Toi Executive Engineer PHE, Nongstoiñ Division u ba long ruh hajuh ka por u dkhot ka DSBMG, West Khasi Hills Nongstoiñ bad u kongsan jong katei ka sngi kyrpang. La synran lang ruh ïa utei u ophisar da ki Block Development Officer ka Mawthadraishan, Nongstoiñ bad Mawshynrut C&RD Block.
Ha katei ka sngi ka ophis ka la ïoh ruh ban sam ïa ki khusnam sha ki katto katne ngut kiba la shna ïa ki phlim lyngkot, haba ïadei bad ka jinglehkhuid bad kiwei kiwei bad ha kajuh ka por la ïoh ruh ban pule ïa ka jingthoh “Bam Smai” haba ïadei bad ka khuid ka suba.
Nalor kitei ki ophisar la ïadonlang ruh I kong B.Parïong, Accountant cum District Consultant, DSBMG, West Khasi Hills District, ki katto katne ngut ki riew pawkhmat na ki lai tylli ki block kaba kynthup ïa ka Mawthadraishan, Nongstoiñ bad Mawshynrut C&RD Block. La pynïaid ïa katei ka jingïalang da u bah J.R. Nongsiej District Co-Ordinator DSBMG, West Khasi Hills District.
U Bah D.Toi Executive Engineerr, PHE, Nongstoiñ Division haba ai jingkren ha katei ka sngi u la ong, “Lada ngi long ki briew kiba leh khuid ngin ïoh ka met ka phad kaba koit kaba khiah, ngin dap ruh da ka mynsiem kaba khuid, dei u Mahatma Gandhi u ba la ïaleh shitom ban pynphriang ïa ka jingleh khuid nyngkong ha Ri India, Ngi dei ban tip hi dalade kumno ban lehkhuid”.
“Ka shnong Mawlynnong ka dei ka nuksa kaba bha tam ïa ngi tang, namar ba ka long ka shnong kaba khuid ki nong jngoh kai pyrthei ki tuid bad ki nongshong shnong ki don ka jingïoh nong haba kum ha kane ka juk kaba hiran ban ïoh kam ïoh jam. Hynrei, dei tang namar ka jinglong khuid jong ka shnong ka wanrah ïa ka kamai ka kajih ha ka shnong, hangne ka pynsngewthuh ba tang na ka daw jong ka jingleh khuid ka spah ka la beh nadien”, u la ong.
