Shillong Lber 23: U MLA ka BJP u Bah Sanbor Shullai hynne ka sngi Saitjaiñ, ula ong, lada jop ka Kong Ampareen Lyngdoh bad ka Agatha Sangma ha ka elekshon MP Lok Sabha ka long kaba thikna ba kin ioh long ki Myntri ka Sorkar Pdeng.
“Ka jingai jingkyrshan ka BJP ia ka NPP ha Meghalaya kala pynthikna ba 100% ka Kong Ampareen bad ka Agatha ki kyrtong ka NPP ba kin jop ia ka elekshon MP bad kan long ka rekod ba kine baroh ar ngut ki longkmie kin jop bad kine baroh arngut na ka bhah jong ki kynthei kin ioh long ki Myntri ka Sorkar Pdeng baroh arngut” ong u Bah Sanbor Shullai haba iakren bad ki nongthoh khubor.
Ula ong, ban phah da kiwei kan long kaba sepei, hynrei lada phah da ka Kong Amapareen bad Agatha ka lad ka don bha ia ki, ban ioh long Myntri bad kin lah ban wanrah ia ki kam pynroi ha ka jylla bad ban thaw ia ki lad ban aikam aijam ia ki samla kiba khlem kam khlem jam.
Haba kylli la ka BJP kala ai iaka jingpynthikna ba kitei ki kyrtong ka NPP lada ki jop ia ka elekshon kin ioh ia ka shuki myntri, u Bah Sanbor ula ong, “Kidei beit ban ioh namar kadei ha ka sien kaba nyngkong duh ban jop arngut ki kynthei bad kan long ruh ka rekod ba baroh ar ngut kin jop na ka NPP bad baroh ar ngut kin ioh long Myntri ka Sorkar Pdeng bad kan long ka jingmyntoi kaba khraw ba kin iatai bad iakren halor ki mat kiba sahteng kiba dei na ka bynta ka bha ka miat jong ki paidbah ka jylla, ki samla khlem kam khlem jam bad ban wanrah ia ki kam pynroi ki bapher”.
U Bah Sanbor ula ong, ba ym don jingsngew eiei halor ka jingshim rai ki Nongialam ka BJP ban ai jingkyrshan noh ia ka NPP ha ka elekshon MP Lok Sabha ha Shillong bad Tura Constituency namar ka NPP bad ka BJP kidei kiba iatreilang ha ka Sorkar MDA bad kumjuh ruh ha ka Sorkar NDA.
“Kum ki dkhot kiba burom ka BJP ngin bud bad kohnguh ia ka jingbthah jong ki nongialam ka party bad shen yn sa pynlong ia ka jingialang ha kylleng ki District bad ki nongkitkam ka BJP ban sdang ia kanbas bad ban iatreilang ban ai jingkyrshan ia ka Dr Ampareen bad ia ka Agatha. Ka jingwan jingkyrshan ka BJP kala pynthikna ba 100% ka Kong Ampareen bad ka Agatha kin jop ia ka elekshon MP” ong u Bah Sanbor.
