Nongstoiñ, Nailur 28: Ka Sur jong ki nong West ha ka sngi balang jong ka taiew, ka la pynlong ïa ka jingïalang paidbah ha sor Nongstoiñ ban pan jingkyrshan ïa ki paidbah ka West Khasi Hill District, kumjuh ïa ka jaidbynriew Hynñiewtrep ban noh jingïarap da ka pisa sha u Samla Hubert Paliar, uba shah jied ban leit iashimbynta ha ka International Arm Wrestling 2022 ban long ha Turkey ha u Risaw.
U Samla Hubert Paliar u dei uba shong ba sah ha ka shnong Mawrok Mawliehbah hynrei namar ka jingban ka jingduk, une u samla watla ula shah jied ban mihkhmat ia Ri India, hynrei um lah satia ban kyrshan nalade ban leit sha katei ka lympung ialehkai.
Ka Sur ki nong West kala mih shakhmat ban tynrong lem ia ka jingkit ba khia jong une u samla da kaba kyntu bad iawer ia ki paradoh parasnam ban noh lem kat kaba ki sngewlah ia ka song pisa ban pynthikna ba une u samla ka Jaidbynriew un ioh mihkhmat sha kane ka lympung ba khraw jong ka pyrthei.
“Ha ki snem kiba la leit phi la kloi ban noh jingïarap ïa u Amit Paul, hato kan eh aiu ba phin ïarap lem ïa une u Samla. Namar kata ka dei ka kamram bad ka jingkitkhlieh jong baroh ban noh synñiang lem sha une u samla jong ka dong ka thaiñ bad ka jaidbynriew” ong u samla Hamar Lyngkhoi, uwei na ki nongialam ka Sur ki nong West.
U Samla Wanteibok Lyngdoh Secretary ka sur ki nong West u la ong, “Ngi kum ka dong ka thaiñ ngi sngew kmen mynta ba kum ka dong ka thaiñ kala pynmih ia u samla ba wanrah burom ïa ka thaiñ. Kumta ngi la kyrpad ïa baroh naduh ki longkmie ki longkpa ki khun samla jong ka dong ka thaiñ, kumjuh jong ka jaidbynriew ban ïarap lem ïa une u Samla u ba wan na ka longïing kaba duk”.
Ha kajuh ka por u la ther ïa ka sorkar ba balei ka pynslem ban pyntrei ïa ka Sports Policy hapoh ka jylla. “Kane ka jingpynslem ka wanrah ka jingeh ïa kiba bun ki Samla jong ka jaidbynriew khamtam kiba wan na ki longïing kiba duk kum jong u Samla Hubert Paliar”.
“Lada lah pyntreikam ïa kane ka policy, kan ai jingmyntoi shibun ïa ki nongïalehkai kiba thrang ban poi sha ka thong. Ngi kyntu jur ïa ki nongmihkhmat, ki seng mon sngewbha bapher ba kin sngewbha ban mih shakhmat, ban ïarap ïa une u samla” ula bynrap.
Ia kane ka jingialang la pyniaid da u Chairman ka Sur ki nong West samla D Sun bad la pynsdang ia ka da ka jingduwai na uwei na ki rangbah ka thain u Bah Arful Kharbani. Na ka liang ki bahaiing hasem ruh kila wan iashimbynta bad ai jingkren ha kane ka jingialang.
Na ka liang ka Sur jong ki nong West kala pyntip ba kan pynlong biang ia kum kane ka jingialang sa ha iew Rambrai ha ka 29 tarik mynta u bnai bad 30 tarik ha iew Riangdo.
