Shillong, Lber 29: Ka Watershed Yatra kaba la pynlong hapoh jongka Pradhan Mantri Krishi Sinchayee Yojana (PMKSY) Watershed Development Component (WDC) 2.0, la pynlong hynne ka sngi ha ka shnong Mawan kaba hap ha ka Mylliem C&RD Block, East Khasi Hills.
Ka jingthmu jong kane ka prokram, ka long ban kyntiew ia ka rukom pyndonkam ia ka um bad ban pynneh ia ka khyndew ryngkat ka jingpynshlur ia ki shnong ki thaw ban iashimbynta lang ha ka sienjam ban pynneh pynsah ia ki tyllong um.
U Nongaibuit jong u Myntri Rangbah ka jylla u Bah Hamletson Dohling, ula plie ia ka jaka kaba la shna bha kaba mih ka umpohliew ban pynneh pynsah ia ka um ha katei ka thain bad ula kren ruh shaphang ka Watershed Programme bad ki jingmyntoi kiba ioh na ka bad ula pyntip ba ka Sorkar India bad ka Sorkar Jylla kila trei shitom ban pyntreikam thikna ia kane ka projek.
Ula pynpaw ruh ba u don ia ka jingkyrmen kaba skhem ba lyngba kane ka prokram, ki paidbah kila ioh ia ki jingpynshai ban iada ia ka mei mariang bad ban pynsaphriang lem ia kitei ki jingtip sha kiwei bad ula kyntu ruh ia ka sorkar jylla ban iatreilang bad baroh kiba donbynta lang, ban iada ia ka mei mariang bad ia ki jingdon jingem ki jongka.
Ha kane ka prokram la iadonlang u Bah Tosanbha Marwein u Block Development Officer ka Mylliem, u Bah W.K. Kharkongor u Divisional Soil & Water Conservation Officer ka Shillong Territorial Division, u Bah N. Khongwir Senior AS&WC Officer jongka Shillong Territorial Division bad ki ophisar na kiwei kiwei ki tnad, ki nongmihkhmat na ki jaka pule bad ki khynnah pule.
Hadien kane, ki nongiashimbynta kila iashimbynta lang ha kaban thung ia ki dieng, kaba pyni ia ka jingiengskhem ban pynneh pynsah ia ka mei mariang bad la sam ruh ia ki sertiphiket sha ki kynhun bad ki riewshimet kiba shimkhia ban iada bad pynneh pynsah ia ki um bad ki tyllong um.
Ia kane ka Watershed Yatra la dep ban pynlong ha North Garo Hills, East Garo Hills, West Garo Hills, South West Garo Hills, South Garo Hills, West Khasi Hills, Eastern West Khasi Hills, South West Khasi Hills bad East Khasi Hills bad mynta yn iai bteng ban pynlong sa ha West Jaintia Hills, East Jaintia Hills bad ha Ri Bhoi district.
 Watershed Development Component (WDC) 2.0, la pynlong hynne ka sngi ha ka shnong Mawan kaba hap ha ka Mylliem C&RD Block, East Khasi Hills.){kind=link}