SHILLONG, Naiwieng 17: Ia ka kot shaphang ka jingwan iuhkjat u Swami Vivekananda ha nongbah Shillong u snem 1901 ba la ai kyrteng daka ‘Swami Vivekananda and Shillong’ ba la thoh da ka Malabika Bisharad la pyllait paidbah hynne ka sngi.
Haba kren sha ki lad pathai khubor ka Malabika Bisharad ka la ong ba kane ka kot kaba don lai bynta, ka kren halor shaphang ka jingleit jngoh jong u Swami Vivekananda ha East Bengal bad ha Shillong, ki kam ba u Swami u la trei na bynta ban sah jinngkynmaw da kaba seng ia ka Ramakrishna Mission bad kumjuh ruh ban pynneh pynsah iaka ïng kaba sah u Vivekanada kaba don ha Laban Shillong.
Ka Malabika ka la ong ba ka jingdon u tei u riew khraw ha kane ka nongbah Shillong ka long kumba 20 sngi bad ha kane ka jingdon jong u la ia kynduh ia u riew khraw ka ri Khasi u Babu Jeebon Roy u ba dei u wei na ki nongseng ia ka Seng Khasi ha u snem 1899.
Ka la ong ba dei ha u snem 1961 ba ka Ramakrishna Mission kala thoh ia ka jignthoh kaba ong dei hangne sah u Swami ha u snem 1901 haba u wan sha Shillong.
“Ha u snem 2009 haba ka leit jngoh ia ka jaka ba sah u Swami kaba don ha Laban nga la kyndit ban iohi ba ka jaka ba ju shong ju sah u Swami ka la sdang ban jot bad pra bad kam shym la tip ba kane ka jaka ka dang don hapdeng ka jingiakhun Muktoduma” la ong ka Malabika.
Ka Malabika kala iathuh ba naduh 2009 ka la sdang ban pynneh ban sumar ia kane ka jaka bad ka la ai khublei ia ki nongbud jong u Swami kiba la ai mynsiem bad kumjuh ia ka sorkar jylla bad ka sorkar pdeng kiba la sngap ia ka jingkyrpad jong nga na bynta ban pynbha ia kane ka jaka.
Ka la iathuh ba ka la thoh kylleng sha ki bor sorkar ha ka sorkar jylla bad kum juh sha ka sorkar pdeng ba kyntu ba ia kane ka jaka dei ban pynneh pynsah kumba ka long da kaba ithuh noh ia ka kum ka jaka kyrpang iaka ïng sah u Vivekanada kaba don ha Laban.
Shuh shuh ka la ong ba kaba sngewtynnad ka long ba ka sorkar pdeng ka la phah jingthoh sha ka sorkar jylla ban bthah ban pynneh pynsah ia kane ka jaka ban sah jingkymaw.
