Shillong, Lber 24 : U Myntri ka Tnad Pule Puthi Rakkam A Sangma, hynne ka sngi Thohdieng, ula pyntip ba ka Sorkar Pdeng kala pyllait ia ka installment kaba ar ban siew ia ka tulop jong ki Nonghikai SSA hapoh ka Jylla.
“Yn sa siew noh kham kloi ia ka tulop kat haduh mynta” ong u Rakkam haba jubab ia ka call attention bala wanrah da u MLA ka UDP na Nongpoh Bah Mayralborn Syiem, hapoh ka Iingdorbar Thaw Ain.
Ula ong ba ka Sorkar Jylla kala trei shitom ban ai ia ka pule dangle kaba janai ha baroh ki kyrdan wat hapdeng ki jingtynjuh ha kiba bun ki liang.
U Myntri ula ong ba ka Sorkar Jylla ka tip bha ia ki jingdawa kum ka jingmang pisa ha ka mang tyngka ka Jylla, ban pynkiew tulop ban pynrung ia ki Nonghikai SSA na ka SEMAM sha ka Tnad, ban thawia ka Education Commission, ban pyndap ia ki kam nonghikai SSA ba lait bad kiwei kiwei.
Ula iathuh ba u snem 2021-2022, ka pisa bala pyllait da ka Sorkar India ka long T. 305 klur bad ka Sorkar kan synniang T. 30.19 klur. Hadien kane, ka Sorkar India kala pyllait T. 272.71 klur bad ka bhah ka Jylla ka long kumjuh kata T. 30.19 klur.
Ka pisa kaba duna ha ka jingpynlut la hap ban ai da ka Sorkar Jylla lyngba ka Corus Fund bad jan kot 90% n aka jingpynlut ka dei tang ia ka tulop.
Pule kham bniah: Kyntait u CEM ka KHADC ba ai NoC iaka lynti rel Tetelia-Byrnihat-Shillong
Nalor kane, ula ong ba ka pisa ba ka Sorkar India kala pyllait ha u 2022-2023 ka long T. 372.36 klur kum ka bhah jong ka bad ka Jylla ka hap synniang T. 41.37 klur kum ka bhah ka Jylla ha kaba ka bhah kala long mar katjuh bad ka bhah ka Sorkar Pdeng kat kum ka rukom sam bhah jong ka Samagra Shiksha.
“Kat haduh u Rymphang 2023, ka bhah ka Sorkar Pdeng bala ioh pdiang da ka Jylla ka long T. 272.34 klur bad ka bhah ka Jylla ka long T. 30.26 klur. Ka Jylla kala pyllait tam ia ka pisa, ka Corpus fund ba T. 104.62 klur nalor ka bhah ka 10 % kaba kot T. 30.19 klur kat haduh u Rymphang 2023” ula pyntip.
Halor ka jingdawa pynrung ia ki Nonghikai SSA sha ka Tnad, u Myntri ula ong “nga lah ban pyntip ia ka Iingdorbar, ba ki School Managing Committee jong baroh ki skul SSA ki dei ki nongthungkam iaki Nonghikai ym ka Sorkar..namar kara, ka policy thungkam ka Sorkar Jylla kam shah satia ban pynrungkam pura ia ki nonghikai contract” ula ong haba bynrap ba ka contract ka dei kaba la iasoi hapdeng ki Managing Committee bad ki Nonghikai jong ki skul SSA shuwa ba kin rung sha ka kam.
Halor ka jingtyrwa ban pynkut noh ia ka jingeh ki nonghikai SSA haba iadei bad ka tulop, u Myntri ula ong ba kane kan shong eh ha ka jingioh ia ka song pisa na ka Sorkar Pdeng.
