Nongstoiñ, Risaw 11: Ka jingai jinghikai ba ar taiew jong ka APPDA Mitra Volunteer phase-III, kaba hap hapoh ka APPDA Mitra Scheme jong ka National Disaster Management Authority (NDMA), la plie mynta ka sngi ka 11 tarik bnai risaw 2022 ha Nongstoiñ College, da u bah M Diengdoh MCS ADC West Khasi Hills District, Nongstoiñ.
Ïa kane ka jingai jinghikai la pynlong da ka District Disaster Management Authority Nongstoiñ bad ha kane ka sngi plie, ïa don ryngkat lang da u bah P.Marbaniang (Retd) Deputy Director DIPR kum u nongai jingkren, Deputy Controller Civil Defence & Home Guards bah W Nonglang, bah J Mawthoh DDMO, DDMA, Nongstoiñ bad Dr Mrs I Mawthoh Principal Nongstoiñ College.
Ha kane ka jinghikai la wan ban ïa shim bynta da ki Volunteer ka NSS bad NYK jong ka Nongstoiñ College bad St Francis Diesis College Siejlieh.
Haba ai jingkren u bah M.Diengdoh u la ong ba ka Jylla Meghalaya ka ïakynduh ïa shibun ki jinglyngshop ka mariang, kumta ki nongïalam shnong bad ki volunteer shnong ki dei kiba nyngkong eh ban hap shim ia ka jingkitkhlieh haba ïa kynduh ïa kine ki bor lynshop ka mariang. Ka jingai training ïa ki volunteer ka long kaba donkam khnang ban pynduna ïa ki jingma bad ban jop ïa ki jingsheptieng, u la bynrap.
U la ong ruh ba ki samla pule ki donkam bha ïa ka jinghikai khnang ba kin lah ban hikai lem ïa ki paidbah ha la ki shnong ki thaw jong ki. U la kyntu ban wan tista bad pynleit jingmut bha ha kane ka jinghikai kaba ar taiew lynter, khnang ban ïoh ïa ki jingmyntoi bad ban ïada lada wan kino kino ki bor lynshop jong ka mariang. U la pynkynmaw ban bud ryntih bha ïa ki SOPs ne jingbthah bad ki jinghikai ba manla ka por haba wan kano kano ka jinglynshop.
Kiwei kiba la ai jingkren ki long u bah W.Nonglang, Deputy Controller, Civil Defence & Home Guard Nongstoiñ ba la pynïaid ïa ka programme, bah P.Marbaniang, Dr Mrs I Mawthoh bad bah J Mawthoh ba la ai ki kyntien khublei.
