Imphal, Naitung 01: Ka jingioh sei biang ia ki 11 tylli ki met iap hynne ka sngi ka la kyntiew sha ka 19 ngut baroh, kata ka ba kynthup ia ki khyndai ngut ki dkhot ka tnat shipai Territorial Army ia ki ba la ioh ban sei ha kane ka sngi Palei ba la dep na ka jaka ba la jia ka jingtwa khyndew ba shyrkhei ha ka jaka ban pyntrei ia ka projek lynti rel ha Noney district ka Manipur, ong ka khubor heh sorkar.
Na ka liang ki heh ka district ki la ong ba haduh kumba 50 ngut ki briew ki dang jah rngai hadien katei ka jingtwa khyndew kaba la wan jia hadien ka jingther u ‘lapbah naduh kine ki khyndiat sngi ba la dep.
Ka lad pathai khubor sorkar ka la ong ba haduh palat 80 ngut ki briew la ngeit ba ki la shah tep im ha kane ka jingjia ha katei ka thain ba long lum. La ong ruh ba haduh kumba 23 ngut kiwei pat ki la ngat ha ka jingmynsaw ha kane ka jingjia bad ki kam aijingiarap ki dang iai bteng da ki bor shipai ha ryngkat ki tnat aijingiarap na ka sorkar pdeng.
U Myntri Rangbah (CM) ka jylla u N. Biren Singh ha ryngkat ka jingsynran lang da ki heh shipai bad heh sorkar ki la pynlong ka jingleit jurip sha katei ka jaka ka ba don hapoh ka shnong Tupul ha ka thain sepngi ka Manipur hynne ka sngi.
Lyngba ka twitter u Singh u la thoh; “Ki myntri sorkar jylla, ki MLA ka thain bad ki heh sorkar ki la leit jurip sha katei ka jaka ka ba la shah ktah ha Tupul ban khmih ha ka ba iadei bad ki kam aijingiarap. Ka jingduh jong ki mynsiem briew ka kynthup ruh ia ki shipai jong ngi, ka long ka jingjia ka ba sngewsih shibun.” “Ngi dang don sa 50 ngut ki ba dang jah rngai.”
Na ka liang ki bor pyniaid ka district ki la maham ia ki nongshong shnong ki ba shong ha ki bynta ba sha them jong ka wah Ijei ba kin mih noh mardor namar ka jingma na ka jinglait jong ka um ka ba la lang ha kane ka wah namar kane ka jingtwa khyndew.
Shuh shuh na ka liang u Myntri Rangbahduh (PM) Narendra Modi bad u Myntri ka sorkar pdeng u Amit Shah ruh ki la iakren bad u Biren Singh bad pynthikna ha u halor baroh ki lad jingiarap.
