Shillong, Naitung 06: U MLA ka Trinamool Congress na Mawsynram Bah Himalaya Shangpliang, u la ai ia ka jingkyrshan ka jong u sha ka Draupadi Murmu kum ka kyrtong iakhun President ka Ri ba la pynieng da ka National Democratic Alliance (NDA) ba ialam da ka BJP.
Ka All India Trinamool Congress (AITC) kala pynpaw ia ka jingartatien ba kan ai ka jingkyrshan ia ka Draupadi Murmu watla ka dei na ka Jaidbynriew Riewlum haba buh kyndon ba ka dei ban kren shai shuwa ba kan ym long tang ka tyngshop jong ka sorkar BJP.
U National General Secretary ka AITC u Abhishek Banerjee ha ka jingwan iuhkjat ba nyngkong eh ha Shillong, ula ong ba ka AITC ka kloi ban kyrshan ia ka Murmu lada ka Sorkar NDA ka pynsangeh lut ia baroh ki kam thombor pyrshah ia ki jaid bynriew riewlum hapoh ka Jylla.
“Ai ba kan wan bad kren shai ba ngan ym sngap satia ia kaei kaba ka Sorkar lane u Myntri Rangbah ne u Myntri kam Pohiing ki sngew hynrei ngan tynjuh beit ia ka Sorkar bad bynshet ia ka jingbahkhlieh haba pynthikna ruh ba ka Sorkar kan treikam hapoh u pud jong ka Riti Synshar ka Ri” ong u Banerjee.
Napdeng ki 12 ngut ki MLA ka AITC ka Jylla kiba wan pyniasoh na ka Congress, tang u Bah Himalaya ula leit iashimbynta ha ka jingialang bala khot halor ka jingwan ka Murmu ba long hynne ka sngi ha Orchid Lake Resort, Umiam.
Haba kylli, u Bah Hima ula pynshai ba ka jingwan jong u sha ka jingialang ka dei namar ka jingkhot sngewbha ban iadonlang khlem da khein ia ki Party ba mihkhmat kumba la khot ia ki MLA jong ki party bapher bapher.
“Nga la wan hangne ym na ka bynta ka TMC, nga la wan kum u riewshimet bad ban burom ia ka jingsngew jong ka snap paid riewlum ka Longkmie kaba la shah jied ban iakhun ia ka elekshon President ka Ri. La khot sngewbha ia nga ban iadon lang ha ka jingialang bad namar kata, nga la wan hangne bad hooid ka dei ka burom ban ioh ia ka Madam Draupadi Murmu kum ka kyrtong kaba dei na ka Jaidbynriew riewlum bad ka Kynthei Riewlum ba nyngkong ban ioh shimti ia ka shuki ba hakhlieh duh ka Ri” ong u Bah Shangpliang.
Haba kylli ba kane ka jingwan marwei ka lah ban pynsuba ia ki paidbah ba u lah ban kynthih sha kawei pat ka seng shuwa ka Elekshon, u Bah Shangpliang ula ong “Ngam don eiei ban ong ia kane bad ka shong ha ki paidbah ba kin khein kat kaba ki khein. Nga wan hangne ban pynpaw ia ka jingburom ia ka Longkmie ka ban sa long ka President ka Ri bad ka dei ruh ka burom ban iakynduh ia ka”.
