Shillong Rymphang 27: U MLA ka BJP na South Shillong Constituency Bah Sanbor Shullai ula ai dorkhas ha u President ka BJP Meghalaya ba dawa ban ai tiket MP-Lok Sabha na Shillong sha ka Dr Finela Lyngdoh Nonglait.
U Bah Sanbor ryngkat bad katto katne ki nongialam ka seng kila pynpaw ba ki ai ka jingkyrshan kaba pura ia ka Kong Finela Lyngdoh kum ka kyrtong ka BJP ban iakhun ia ka elekshon MP Lok Sabha na Shillong Constituency.
U Bah Sanbor ula ong ba u Bah AL Hek ym shim la pan tiket hynrei ka kyrteng ka jongu kala shu paw tang ha ki kot khubor bad kum ki nongialam ka seng kin iatylli lang kawei na ka bynta ban iatrei na ka bynta ka Kong Finela.
U Bah Sanbor ula ong ka Kong Finela kadei ka kyrtong kaba biang tam ban iakhun ia ka elekshon na ka seng BJP namar kadei ka briew kaba ki paidbah ki ithuh ithaw bha bad kadei ka briew kaba la nang la stad bha bad ka BJP ka long kaba donbok da ka jingdon ki nongialam kum ka Kong Finela.
U Bah Sanbor ula kynthoh ba u Bah Pala ba ula shu lapmiet ka ktha sohot baroh san snem bad ki paidbah kila babe haba kyntu ia ki paidbah ba ki dei ban nang noh ha ka ban jied Nongihkhmat namar ka BJP kan dang wan ha ka bor bad lada pynjop ia ka Kong Finela, kan wanrah ia ka dud bad ka ngap ia ka jylla.
“Kane kam dei ka elekshon MLA ne MDC….kane kadei ka elekshon MP ha Delhi kumta ki paidbah ki dei ban jied beit da ka BJP namar kan dang wan beit ha ka bor hapoh ka jingialam u Narendra Modi” ong u Bah Sanbor.
Ula ong ba ia kane ka dorkhas, u President ka BJP Meghalaya un sa phah lang sha ki nongialam ka BJP kiba kynthup ia u Chubba Ao bad u Ritiraj Sinha ban pynpaw ba ki ai jingkyrshan ia ka Kong Finela ba kan long ka kyrtong MP jong ka seng BJP.
“Nga lah kren ia u Bah Ernest Mawrie uba la thep kyrteng bad ngan pynsngewthuh ia u ban weng kyrteng noh ialade na ka jingpan tiket bad ngan leit ruh ban iakynduh ia u Bah AL Hek ba ngi donkam ban iatreilang bad iatylli lang kawei ban pynjop ia ka kyrtong ka BJP ha ka elekshon MP Lok Sabha” ong u Bah Sanbor.
U Bah Sanbor ula ong “Lada ka Kong Finela ka jop ia ka Elekshon MP ka long kaba thikna ba kan ioh ia ka Shuki Myntri Sorkar hynrei lada ki paidbah ki jied pat da kiwei, ka long kaba thikna ba kin shu bam sohot baroh 5 snem”
