Shillong, Nailur 26 : U MLA ka BJP bad Myntri Sorkar Bah Alexander Laloo Hek, ula pynpaw ia ka jingkyrshan halor ka jing thung ia u Rikman Momin kum u President ba thymmai ka BJP-Meghalaya.
Haba iakren bad ki nongthoh khubor, u Bah Hek ula ban ba u Rikman u dei uba la trei la slem hapoh ka Party, u dei ruh uba la iakhun ia ka elekshon MP na Tura bad u dei u Dkhot bala slem bha jong ka National Council kane ka party.
Ula ong ba ka jingaiti u Rikman bad jingdon slem ha ka party kala dei hok ia u ban ioh ia ka kam kum u President ka Jylla.
Haba jubab ia ka jingkylli halor ka jingshah weng noh u bah Ernest kum u President, u bah Hek ula pynshai ba kane hi ka dei namar ba ka samoi treikam u Bah Ernest kala kut bad kam don pat da kiwei ki daw halor ka jingweng noh ia u.
Haba kylli ia ka lynti jong u ban ioh shimbynta kum u President ka party, u Bah Hek ula iathuh ba ka Party BJP ka bud ia ka nongrim “Uwei u Briew, kawei ka kam” ka rule bala buh ha ka riti treikam jong ka party.
Ula iathuh ruh baka jingthung ia u Rikman Momin ka dei shibynta na ki buit treikam jong ka party ban pynkhreh ia ka elekshon ban wan.
Ha ka 25 tarik Nailur, ka BJP kala thung ia u Rikman Momin kum u President ka Meghalaya BJP. Ia ka jingpynbna la pynmih da u National General Secretary Arun Singh haba pyntip ba u National President JP Nadda ula thung ia u Rikman Momin kum u President ka Meghalaya BJP.
