Shillong, Risaw 07: Ki paid nongshongshnong ka thain Umroi, kila ai ka jingkyrshan ia ka project ban pynheh ia ka kad liengsuin ha Umroi-ka Shillong Airport, ha ka public hearing ba long ha ka sngi Ba-ar.
Watla ki nongialam shnong kila pynpaw ba ki ai ka jingkyrshan ba pura ia ka project, kila pynpaw pat ia ka jingsngew khia haba iadei bad ka lad iohkam iohjam ia ki trai shnong.
Haba kren sha ki lad pathai khubor, u Director ka Shillong Airport Rajeev Rajan ula pyntip ba kane ka project kan pynlah ia ka Kad ba kan ai jaka hiar ia ki liengsuin kiba heh kum ka A320, da ka jingpynjrong ia ka runway na ka 1829 meter sha ka 2400 meter.
“Ia ka runway yn nang pynjrong sa 571 meter ban lah hiar ki liengsuin kiba heh. Ia ka terminal building ruh yn nang pynheh na ka 5000 sqm sha ka 10,500 sqm” ula ong haba bynrap ba ka Sorkar kala khmih ia ka kam thied jaka na ka bynta ka project.
U Ranjan u pyntip ba kane ka project ka dang don ha ka bynta jong ka jingkhot tender. La khmih lynti ba kane ka project kan shimpor 18 bnai hadien ba sdang ban pyntrei ia ka.
Ki bor pyniaid ka Kad kila kular ba ki trai shnong na ki shnong ba marjan kin ioh hakhmat eh ha ka lad iohkam iohjam.
“Ka jingpyntrei pynheh yn sa leh da ka agency bad ngin pynthikna ba katba lah, ia ki semi-skilled, unskilled yn shim na ki shnong ba marjan katba ia kiwei, ngin pynthikna ba kan iaid kat kum ka jinglah jong ki, ngin pynthikna ba ki briew kiba dei ki highly skilled bad kiba don ka sap ba la pyntbit kyrpang kin ioh lang ia ka lad” ula ong.
Kat kum ka jingong jong u, kumba 70-80 percent ki briew kiba trei ha kane ka Kad ki dei ki trai shnong.
Haba kylli, u Ranjan ula ong “Ngin ia peit shuwa lada ka jingwan ki briew ka kot 1.5 million shisnem bad ka kiew sha ka 5-6, ngin hap ban pynbun haduh lai-saw shah ha ka jingthungkam”.
U Director ula pyntip ruh ba ka Kad ka don jingthmu ban pyntrei ia ki CSR project, kynthup ka jingtyrwa ban pynshna ia ka iingskul na ka bynta ki khynnah ki bym lah ban iohi ki khmat.
Ka Kad ka dang iatreilang ruh bad ka Tnad Pule Puthi ban pynkynriah noh ia ka lynti iaid jong ka nala kaba khang lynti ia ka um sha ki nongrep kiba don sharum.
