Shillong, Nailur 23 : Ki Nongshongshnong ka shnong Nonghali, East Khasi Hills, kila ai ka jingkyrshan ba pura ia ka jingtyrwa ban buh ia ka jaka theh niut kat kum ka juk saian hapoh ka Shnong.
Ia kane la pyntip da u Sordar ka Nonghali Bah Hanboklang Mynsong hadien ka public hearing bala pynlong ha ka sngi Ba-ar.
Kat kum ka jingong u Bah Mynsong, ka public hearing na ka bynta kane ka project ka long kaba jop, ban ym shym la don satia kano kano ka jingpynsngew ba pyrshah na ki trai shnong.
Hynrei, ula ong ba ki nongshongshnong kila pynpaw ia ki katto katne ki kyndon ba kin ai ka jingkyrshan kiba kynthup ba ka Sorkar kan pyntreikam ia ka projecr kumba la pynshai bad kular, da kaba pyndonkam ia ka jingstad saian.
U Bah Mynsong ula ong ba ka Shnong ka dawa ruh ia ka jingpyniasoh surok kaba paka, ka bording kaba biang bad kiwei ki jingdonkam hapoh ki jaka ban treikam ka project.
“Ka Sorkar kala kular ban aikam ia ki trai shnong, kaba dei ka sienjam kaba pdiang na ka bynta ki nongshongshnong” ula ong.
Nalor kane, u Sordar ula pyntip ba ka Shnong kala dawa ban siew bailutksan ba kyrpang ia ki trai jaka, haba buh hakhmat ia ka jinglong kongsan jong ka project bad ka jingkitkhlieh bala shim da ka Shnong.
“Ngi sngew ba ka Sorkar Jylla ka dei ban mynjur ha kaban siew ia ka bai jaka kaba kyrpang namar ka shnong kala tynrong halade ia ka jingkitkhlieh ba kongsan bha, ban shakri ia ka district baroh kawei” ula pynpaw.
U Bah Mynsong ula kyntu ia kito kiba pyrshah ia ka project ba kin phah da ka jingthoh ia ka jingsngew khia jong ki sha ka Dorbar Shnong, khnang ba ka Dorbar kan shong ban shong bishar bad ban leh eiei.
Ula pynpaw ruh ia ka jinglyngngoh halor ka jingpyrshah da ki katto katne ki kynhun, haba pynpaw ba kine ki kynhun kila dei ban wan iashimbynta ha ka public hearing ha ka jaka ban iapyrshah ha surok.
Haba kylli, u Sordar ula ong b aka jaka bala tyrwa ban pyntrei ia ka project ka dei jong ka Dorbar Shnong bad ka pisa ba ioh lum na ka project, yn sa pyndonkam ha ka rukom kaba dei.
Ha u bnai Lber mynta u snem, u Symbud Myntri Rangbah ba khmih ia ka Tnad Urban Affairs Bah Sniawbhalang Dhar ula pyntip ba ka Tnad kala dep ithuh bad jied ia ka jaka ha Nonghali ba heh 112 acre ban pynlong jaka theh niut.
Ka Sorkar kala thung ia ki Consultant ba kin pynkhreh ia ka Environment Impact Assessment (EIA)/Environmental Management Plan (EMP) bad ban pynioh ia ki jingbit ban shna ia ki jingtei jong ka project ka ban ai ka jingshakri ia ka sor Shillong bad ki jaka khapsor.
