Kyrshan ka RSS ia ka jinglong laitluid ban ngeit niam | Kyntait ia ka jingibein niam : ong u Hosabale ha Shillong

Shillong, Lber 22 : U General Secretary ka Rashtriya Sawyamsevak Sangh (RSS) Dattatreya Hosabale ha ka sngi U Blei ula ong ba ka RSS kam kyrshan satia ia ka jingibein ia ki briew na ka jingngeit niam bad bat ia ka hok ki Nongshongshnong kat kum ka riti synshar ba ki long laitluid ban ngeit ia kano kano ka niam, haba ban jur ba ka Bharat ka dei jong baroh lang.

U Hosabale ula kren ia kane ha ka jingialang ki dkhot bala pynlong da ka RSS Meghalaya ha Shillong kum shibynta jong ka jingrakhe dak shisnem jong ka seng. Kane ka jingialang bala pynlong ha ka hotel ha Shillong, ka khot ia u Hasabale, RSS Sarkaryavah (General Secretary) kum u nongai jingkren ba kongsan.

Haba pynkynmaw ia ka jingdon jingiadei ka Shillong bad ki riewpawkhmat kum u Swami Vivekananda, Rabindranath Tagore bad Netaji Subhas Chandra Bose, u Hosabale ula niew ia kane ka jingialang kum kaba kongsan eh ha kane ka jingdap 100 snem. Ula iathuh khana ia ka jingiaid lynti ka RSS naduh ba seng ia ka ha u snem 1925 ha Nagpur da u Dr Keshav Baliram Hedgewar, kaba la nangkiew na ka jingrung dkhot ba jan kot 85,000 shisngi ha baroh kawei ka Ri.

U Hosabale ula ong ba u Hedgewar, uba itynnad ia ki lynti iakhih laitluid bapher bapher ka Ri India, u kwah ban sngewthuh ba kumno ka Ri bala shai bad ba riewspah ha ka kolshor ka duhnoh ia ka jinglong laitluid, haba kdew ia ka daw sha ka jingiapait iapra hapdeng ki imsalang sahlang. Kane kala lam sha ka jingthaw ia ka RSS da ka jingpynleit jingmut ha ki Sengbhalang bad ka jingkyrsiew thiah ia ka ri. “Ka RSS ka kwah ban pynitylli ia baroh ka imlang sahlang ha ka jaka ban long tang kawei pat ka Seng” ula ong.

Haba kren halor ka jingkdup lang ka Bharat ia ki jingleh tynrai ki nongshongshnong, ula kdew ia ka histori ba kumno ki jaidbynriew Parsis bad ki Jew kiba shah lehbein, kila ioh jaka rieh hapoh ka Ri. Ula ong ba ka jingbun ka ktien ka thylliej bad ka kolshor ha India ka dei kaba pynkhlain iaka jingiatylli, kaba la paw shai ha ki jingop ka Ri na ki kam ialehkai, ka space mission kum ka Chandrayaan-II, hynrei ula bynrap ba ka RSS ka kwah ban wanrah ia kane ka jingtylli lyngba ki kam trei monsngewbha bad ka jingsaindur ia ka jinglong ki nongshongshnong.

Haba kren halor ka jingmut bakla halor ka RSS, ula ong ba kane ka spah snem ka thmu ban pyniar ia ka lyngkha treikam da ka khubor “Desh hame deta hai sab kuchh, hun bhi to kuchh dena seekhein” (Ka Ri kala ai lut ha ngi ia kiei kiei baroh, ngi ruh ngi dei ban hikai ban ai kylliang”.

Ha ka jingiamir jingmut bad kylli jingkylli, u Hosabale u la pynpaw ïa ka jingma jong u drok kaba nang kiew kum ka jingeh ha ka rukom im bad ka jingïada, da kaba khot ïa ki jinglong ba khlaiñ jong ka longïing bad ka jingpeitngor pyrshah ïa ka jingkhaii drok na ki jaka khappud. Halor ka jingpynkupbor ïa ki kynthei, u la ong ba ki riti dustur jong ka ri India ki ithuh ïa ka jinglong nongïalam jong ki kynthei hynrei u la ban jur ïa ka jingdonkam ban pynduh noh ïa ki riti dustur kiba pynmynsaw. U la pynpaw ruh ia ka jingdonkam jong ka jingiakren hapdeng ki pateng ban pynkupbor ia ki samla.

Haba jubab ïa ki jingkylli halor ka thaiñ shatei lammihngi, u Hosabale u la ong ba ki jingleit pynlong jingialang kila ïarap ban pynduna ïa ka jingsngewthuh bakla shaphang ka RSS, watla ki jingtip kiba bakla ki dang sah ia kaba u ong ba ki don kiba pynsngewthuh bakla da ka jingthmu na lyndet.

Haba pynpaw biang ïa ka nongrim ka RSS, u la ong ba ka pyrshah ïa ka jingniewbein niewkhoh na ka jingiapher niam bad kyrshan ïa ka hok jong uwei pa uwei u nongshong shnong ban iaid hala ka jong ka jingngeit.

U la pynkut da kaba ong ba ka jingkiew jong ka ri ka shong ha ka jingkitkhlieh lang bad ki jinglong babha, da kaba bynrap ba ka lad kaba bha tam ban sngewthuh ia ka RSS ka long lyngba ka jingiakren markhmat.