Nongpoh, Lber 25 : Ka Khasi Students’ Union (KSU)-Nongpoh Circle bad Saiden Unit, ha ka sngi Ba-ar, kala ai jingkyrshan ia ka skul Saiden Secondary School da ki miej bad ki ben shong ba kan lah pynbiang ia ka jingdonkam jong ki Khynnah.
Ia kine ki miej bad ki ben la aiti da ki Nongialam ba kynthup ia u President ka KSU Nongpoh samla John Lyngdoh, General Secretary Banshanlang Kharshanlor bad kiwei kiwei.
U Principal ka skul Bah James Nongsiej ula shimti ia kine ki miej bad ki ben ba 10 tylli ha ka jingiasakhi lang ki nonghikai bad ki khynnah skul.
Haba ai jingkren, ki Nongialam ka KSU kila pynpaw ia ka jingsngewkmen ban ioh tynrong lem ia ka jingkitkhlieh ban kyrshan ia kane ka shlem ai jingnang jingstad kaba la peit bad kyrshan hi da ka Dorbar Shnong Saiden hapdeng shibun ki jingduna.
Ki la pynpaw, ba hadien ka jingioh jingtip halor ka jingdonkam jong kane ka skul ia ki ben shong, ka seng kaba don ia ka thong ban kyntiew ia ka pule puthi, ki la shim da ka sienjam ban pynioh ia kine ki jingdonkam, da kaba kyntu ruh ia ki nongpyniaid skul ba kin nym duh mynsiem ha ka jingshakri ka jong ki hynrei ban iai bteng ia ka jingtreishitom ban pynphriang ia ka jingnang jingstad.
“Ka jingnang jingstad ka dei u budlum jong ka lawei ba phyrnai jong u wei pa u wei u khynnah pule, kumta kum ki khynnah pule ki dei ban iai minot bad treishitom ha ki jingpule ka jong ki lada ki thrang ban kiew ha ka jingim jong ki”, ong ki nongialam ka KSU.
Na ka liang u Bah James Nongsiej, haba pdiang ia kine ki jingai sngewbha, u la ai khublei kyrpang ia baroh ki nongialam ka KSU kiba la kloi ban pynioh lem ia ki ben shong na bynta ka jingbit jingbiang jong ki khynnah pule.
-Nongpoh Circle bad Saiden Unit, ha ka sngi Ba-ar, kala ai jingkyrshan ia ka skul Saiden Secondary School da ki miej bad ki ben shong ba kan lah pynbiang ia ka jingdonkam jong ki Khynnah.){kind=link}