Shillong, Feb 25: Ka MLA ka Gambegre ka Mehtab Chandee A. Sangma hynne ka sngi Balang, kala ai ka jingkyrshan kaba pura ia ka Mang Tyngka 2026–27 jong ka jylla bad ong ba kadei ka “Jingiohi jngai, kaba long salonsar ia ki kynthei bad shynrang bad kaba iaid katkum ka SDG” ka lynti iaid kaba biang tarajur ia ka jingkiew bad ka jingpynlut bad kala kyntu ia ka sorkar ba kadei ban peit ia ki jingduna ha ka jingai jingsumar da ki Specialist bad ka jingpyniasoh ia ki jaka kiba don ha kyndong ne jngai tam ha ki thain nongkyndong.
Haba kren ha ka iing dorbar, ka Mehtab Sangma kala ong, ba ka Mang Tyngka ka pyni ia ka jingbteng ban pyniaid shakhmat ia ki jingtei, ban pyniar ia ki surok, bording bad ka jingpyniar ia ka Digital kaba iarap ban pyniasoh ia ka thain nongkyndong bad Sor ha ka ioh ka kot.
“Ka jylla jong ngi kala sakhi ia ka jingkylla kaba shisha ha madan. Na ka polisi sha ki jingtei, ki sap trei bad jingsengkam, ka sorkar kala trei ha baroh ki liang ban don ka jingkiew ha baroh ki bynta” kala ong.
Haba kren halor ka kaiphod jongka jingkiew ka jylla Meghalaya kaba 10% na ka bynta 3 snem kynthih, ka Sangma kala ong, ba ka jylla kala iaid ha ka lynti kaba dei.
Kala kdew ruh ia ki sienjam kiba la shim lyngba ki prokram kum ka MegARISE, Payment for Ecosystem Services Programme bad Green Meghalaya bad ka pynpaw ia ka jingiada ia ki tyllong um, ka jingpynrben biang ia ki khlaw bad ka jingai jingkyrshan ia ki shnong kaba iaid ryngkat bad ka thong jong ka jylla bad ka pyrthei ban pynduna ia ka jingpynmih ia ka Carbon.
Kala ong, ba ka T.2,472 Klur kaba la mang ia ka tnad ka koit ka khiah (kumba 9% na ka mang tyngka) kadei kawei na ka jingpynlut kaba heh tam ha ka ri, haba ianujor bad ka jingpynlut ka ri ia ka koit ka khiah ki paitbah kaba long tang 2% na ka GDP. Kala kdew ruh ia ka jingpyniar ban thungkam ia ki doctor bad ki nurse, ki Community Health Centre (CHC) kiba thymmai kiba dang don hapdeng ka jingshna bad ka jingpynmih shuh shuh ia ki Primary Health Centre (PHC).
Na ka bynta ki nongshong shnong kiba don 30 lak ngut, ka Meghalaya haduh mynta ka don 473 tylli ki Sub-Centre, 116 tylli ki PHC, 31 tylli ki CHC bad 16 tylli ki District Hospital, kala ong bad ka bynrap, ba watla ki nombar ki paw kumba ka long kaba biang hynrei ka jingpynleit jingmut kadei ban long sha ka kyrdan bad ka jinglah ha ka jingmih.
Kala kdew ruh ba kala don ka jingbiang ha ki bynta kiba kongsan, Maternal Mortality Ratio (MMR) kala hiar na ka 318 (2021) sha ka 107 ha man la ka jingkha kaba 100,000 ngut ki khunlung kiba im ha u snem 2024, kaba la jan ia ka National Average kaba 88 ngut ka jingiap ki khunlung kiba dang shu kha kaba la hiar sha ka 34 ha man la ka jingkha kaba 1,000 ngut ki khunlung kiba dang im ha u snem 2024, haba ianujor bad ka National Average kaba long 26.
Ka Sangma kala pynpaw ruh ia ka jingsngewkhia halor kajingduna jong ki doctor Specialists ha ki CHC. Watla ka Meghalaya ka don ar tylli ki medical college kiba la treikam ban pynmih ia ki doctor, kala banjur ba ia ka jingpule Postgraduate (PG) ha ka Medical Course dei ban sdang noh mardor ban pynneh ia ka sap bad ban kyntiew ia ka rukom ai jingsumar.
Kala pynpaw ruh, ba ka jingkyntiew ia ki CHC ban kynjoh ia ki kyrdan kiba la buh da ka Indian Public Health Standards (IPHS), kan iarap ha kaban pynduna ia ka jingkit kaba khia jong ki Civil Hospital ha Shillong, Tura bad Jowai.
Nalor kane ha kaba iadei bad ka tnad Public Works Department, kala ong, ba ka jingpynlut ha ka jingshna ia ki surok bad ki jingkieng kadei ka jingpynlut kaba la heh tam ha ryngkat bad ki projek hapoh jongka PMGSY, CRIF, NESIDS, MITP, Western Bypass bad ka jingthmu ban shna ia ka Shillong–Silchar Greenfield Corridor.
Kala pynpaw ba tang ha ka constituency jongka, kumba 150 tylli na ki 400 tylli ki shnong kim don ia ki lad pyniasoh bad ki don ki bynta kiba dang sah sa kumba
500 mitar haduh 1 km na ka jaka kaba don ka surok bad kala antad ba ka jingpyniasoh ia kitei hapoh jong ka Schedule of Rates kaba mynta yn donkam haduh T.200 Klur.
Kala kyrshan ruh ia ka Chief Minister’s Rural Connectivity Programme kaba la bhah T.43 Klur bad kala kyntu ia ka sorkar ba kadei ban kyntiew ia kane bad ban shim ia ki lad bad ki kyndon kiba iar na ka bynta ki surok ha nongkyndong kiba iaid duna ki kali ban pynthikna ba man la ki shnong kidei ban pyniasoh bad kiwei pat.
Kala ong, ba ka Mang Tyngka 2026–27 kala buh ia u mawnongrim uba khlain na ka bynta ka roi ka par kaba salonsar bad kaba iai neh.
“Da ka jingpyntreikam thikna bad da ka jingshimkhia ka sorkar, ka Meghalaya ka lah ban long kum ka jylla kaba ai nuksa ia ka ri” kala ong bad ka pynpaw ia ka jingskhem jingmut hapoh ka jingialam u Myntri Rangbah ka Jylla u Conrad K. Sangma.
