Nongpoh, Nailur 1 : Ka Central Reserve Police Force (CRPF) jong ka 67 Bn, Shillong, kala ai ka jingkyrshan ia ka Regional Institute of Advance Studies (RIAS), Nongpoh, ba kan ai jinghikai computer khlem ka jingsiew sha ki samla pule ka thain Nongpoh.
Haduh 14 ngut ki samla pule kynthei bad shynrang kila pyndep ia ka Basic Computer Training Centre kaba shi bnai bad ka RIAS Institute, kala sam ia ka syrnod sha kine ki samla ha ka jingialang ba long ha RIAS Institute ha Nongpoh.
Kane ka jingai jinghikai ei ka la long kawei na ki sienjam ban ai lad ïa ki samla pule, khamtam ïa kito kiba wan na ki longïing kiba duna ka ïoh ka kot, ban kyntiew ïa ka jingnang jingtip haka Computer bad ban pynkhreh ïa ki ha ki kam kiba ïadei bad ka teknoloji.
Ha katei ka jingïalang sam syrnod la wan ban sakhi lang u Commandant, 67 BN CRPF Shillong Jai Singh, kum u Kongsan, ryngkat bad u Inspector, E/67 BN CRPF Nongpoh Ajit Singh, bad u Bah Skhem B. Swett, Director ka RIAS, ha ka jingïadon ryngkat lang ki samla pule kiba la pyndep ïa ka jinghikai.
Haba kren kum u Kongsan, u Jai Singh u la ai ka jingïaroh ïa ki samla pule kiba la shim ïa ka kabu ban nang pynkhlaiñ ïa ka jingnang jingtip jong ki shabar jong ki skul. U la ong ba ka jingshah hikai Computer ka long kaba donkam bha ha kane ka juk teknoloji, bad u la kyntu ïa ki samla pule ba kin ym sangeh tang ha ka Basic Course, hynrei kin nang bteng ban pynbit pynbiang ïa ka jingnang jingtip jong ki ha ki kyrdan kiba kham shaneng.
U la ai ruh ka jingïaroh ïa ka RIAS halor ka jingpyrshang jong ka ban pynlong ïa ki jinghikai kum kine, kiba lah ban long ka jingïarap kaba khraw ïa ki samla kiba kwah ban nang bad ban san ha ki kam kiba ïadei bad ka teknoloji.
U Bah Skhem B. Swett, Director ka RIAS, u la ong ba ka jinglah jong ka Institute ryngkat bad ka 67 BN CRPF, Shillong ban pynlong ïa ki Computer Training Course khlem jingsiew ka long ka kabu ksiar ïa ki samla pule kiba duna ka ïoh ka kot hynrei kiba don ka jingthrang ban nang bad ban ïoh ïa ki jingnang jingtip kiba thymmai.
U la pynpaw ruh ba ha kane ka juk kaba mynta, ka jingnang ban pyndonkam ïa ka Computer ka long kaba kongsan bha ha kiba bun ki bynta jong ka jingim. U la ong ba wat lada ki samla ki pyndep ïa ki jingpule, ka jingduna ha ki sap kiba ïadei bad ka Computer ka lah ban wanrah ïa ki jingeh ha ka ïohkam ïohjam.
Kumta, u la kyntu ïa ki samla pule ba kin shimkhia ban nang pynïar ïa ka jingnang jingtip jong ki, khnang ba kin lah ban ïakhun bad ïaid ryngkat bad ki jingkylla ha ka juk teknoloji bad ban ïoh ïa ki lad kiba kham bun ha ka liang ka pule puthi bad ka ïohkam ïohjam.
