Kyrpad u VC ka NEHU ia ki nonghikai ban ai ka jingiatreilang ban ioh pyndep noh ia ka CAS

Shillong, Lber 22: U Vice Chancellor (VC) ka North-Eastern Hill University (NEHU) u Prof PS Shukla, ula pynthikna ia ki nonghikai jong ka skulbah ban pyndep noh ia ka jingpynkhreh pura ia ka Career Advancement Scheme (CAS) khnang ba yn ioh ban pyniaid beit ia ka jingkyntiew kyrdan ha ka kam hapoh jong ki katto katne bnai.

Ha ka jingkyrpad ka jongu Prof Shukla ula pynpaw ia ka jingsngew burom bad ula ai khublei ia baroh ki nonghikai jong ka skulbah halor ka jingtrei shitom ka jongki ha kaban noh synniang ia ka skulbah NEHU.

“Phi long ki paia jong ka skulbah, kiba btin lynti ia kiba dang samla ha ka jingmut jingpyrkhat bad ban pynwandur ia ka lawei lyngba ka jingkitkhlieh ha ka kam hikai, jingwad bniah bad ka jingkiew irat ha ka pule puthi hapoh jong ka National Education Policy” ula ong.

Ula pynpaw ba ka kynrum kynram kaba la mih kala ktah jur bha baroh ki liang ia ka skulbah bad u VC ula ong, “Nga tip bha ba kine kila wanrah ia ka jingpynslem ia ki kam kiba kongsan khamtam ha kaba iadei bad ka jingkyntiew kyrdan jong ka CAS. Haba nga la sdang ia ki kam kiba iadei bad ka CAS ha ka sien ka baar ha u snem 2024, ka jingthmu ka jong nga ka long ban pyndep ia ka jingkyntiew kyrdan ha u Lber 2025, da kaba phaikhmat kyrpang na ka bynta kito kiba don ha ki kyrdan kiba heh ha ka kam shakri ka jong ki, khamtam eh na ka bynto kito kiban sa shongthait noh na ka kam. Hynrei namar ka jingmih ki jingeh ki bym lah ban kiar kala pynsahkut ia ki kam ki jam baroh bad kane ka dang iai bteng haduh mynta”.

“Nga sngewsih ia ka jingpynslem bad nga kwah ban pynthikna ba ka jingpynkhreh kaba pura ia ka CAS kadei ka mat kaba hakhmat eh. Nga shim ia ka jingkitkhlieh kaba pura ban pyndep noh ia kane ka kam kyntiew kyrdan hapoh ki katto katne bnai” ula pynthikna ia ki nonghikai bad ka bynrap da kaba ong, “Ka jingithuh bad ka jingai khusnam ia ka jingtrei shitom, ka jingaiti bad ka jingnoh synniang jong ki nonghikai ha ka pule puthi ka long kaba kongsan bha bad nga iengskhem ban pynthikna ba kito ki nonghikai kiba dei hok kin ioh noh ia ka jingithuh khlem kano kano ka jingpynslem shuh”.

Nalor ka CAS, u Prof Shukla ula pynpaw ba ki kynrum kynram kiba la mih kila ktah jur ia ki jingthmu jong ka NEHU ha ka jingai jingnang jingstad bad ka kam wad bniah.
Ula ong ba ka jingtrei suki ia ki kam ki jam da ki bor kiba dei khmih, kala wanrah ruh iaka jingsuki ha kaba iadei bad ka jingshim ia ki rai kiba kongsan kaba la ktah ia ki samoi jongka pule puthi bad kala wanrah ruh ia ka jingbym thikna ha ki samla pule ia kaba 82% kidei kiba na Meghalaya.

Ula kyntu ia ka jingdonkam ban pynneh biang ia ka jinglong jingman ha ka skulbah.
U Prof Shukla ula ong, “Kitei ki samla pule ki phai sha ngi ban ioh ia ka jingbtin lynti, ka jingneh ia ka jinglong jingman bad ia ka jingnang jingstad. Kadei ka jingbahkhlieh lang ka jong ngi ban ai iaki kaba bha tam ha baroh ki liang ha ka pule puthi ha ka skulbah. Ka skulbah ka kiew shaphrang, haba ki nonghikai, ki nongtrei bad ki bor pyniaid ki iatreilang da kaba sngewthuh jingmut bad bud ia ka rukom kaba dei ha ka jingai jinghikai”.

“Nga kyntu ia ka jingshemphang bad ka jingaiti ka jong phi baroh. To ngin iatreilang ban pynneh ia ka jinglong jingman bad ban pynleit jingmut ha ka thong kaba ngi ia donlang, ban kiew ha ka pule puthi, ban ioh jingithuh ki nonghikai bad ki samla pule kin long kiba seisoh. Ka jingseisoh jong ka NEHU kan shong ha ka jingiatylli bad ka jingdon lang ia ka jingiohi jngai” la kyntu u VC.

Ula pynthikna ruh da kaba ong, “Ki jingkhang ki jong nga ki long kiba plie kumba ju long. Nga don hangne ban sngap, ban iatreilang bad ban kyrshan ia iwei pa iwei ha kaban pynurlong ia ka mishon jong ka pule puthi ka NEHU. To ngin ia jam lang shaphrang, iatyllilang da kawei ka jingmut bad ban trei na ka bynta ban pynlong ia ka NEHU kum ka jaka pule kaba baroh kin sngewsarong”.