Shillong, Risaw 21: Ka Nongtluh Mathan Maramian Development Forum (NMMDF) haka jingialam u MLA ka UDP na Nongpoh Bah Mayralborn Syiem ha ka sngi Ba-ar, kala phah tuklar ha u Symbud Myntri Rangbah ka Jylla Bah Prestone Tynsong ban pynsted noh ia ka jingpynkha iaka community & Rural Development (C&RD) block ha Umden Ri Bhoi.
“Ngi kyrpad ïa ka jingpeit bniah jong phi ban kyrshan bad pynsted ïa ka jingthaw ïa ka Umden C&RD Block, da kaba pynurlong ïa ka jingangnud ba la slem jong ki paidbah ka thain” ong ka NMMDF ha ka dorkhas bala aiti ha u Symbud Myntri Rangbah u Bah Prestone Tynsong.
Haba kren sha ki lad pathai khubor, u MLA ka Nongpoh u la pynpaw ïa ki jingeh ba ki paidbah ki ïakynduh namar ka jingheh jong ka Umling Block kaba ai jingshakri ïa kumba 224 tylli ki shnong kaba pynlong ïa ki nongïalam shnong, ki kynhun self help group bad ki paidbah nongshong shnong ban shem jingeh ban ïoh ïa ki jingshakri ba kongsan.
“Ka thain Nongtluh Mathan Marmain ka kynthup ia palat 130 tylli ki shnong, kiba bun na ki ki don palat 80 km na ka Umling C&RD Block kaba pynlong iaka leit ka wan kaba palat ia ka 160 kilomitar” la ong u Bah Mayralborn bad ula bynrap daka ba ong ba haduh 60% na kine ki shnong ki don ha jan ka Kamrup Assam ka thain kaba jur ka jingiakajia pud.
Ban weng ia kine ki jingeh, u MLA ula iathuh baka Forum ka la ithuh iaka jaka kaba biang na ka bynta ka jingthmu ban shna Ophis C&RD Block ha Umden, kaba la noh synniang da ka Raid Nongtluh-Umden khlem da siew pisa.
“Shuh shuh, ka jingwad bniah kaba bniah bala pynlong daka Ophis Block Level ha u snem 2022 ka pynskhem khlem jingartatien ïa ka jingdonkam ba kongsan jong kane ka Ophis thymmai ban kyntiew ïa ka jingroi ka par haka thain” u la ong.
“Ka jingthaw ia ka C&RD Block ha Umden kadei kum ka sienjam kaba pynkylla sha ka jingpynbeit ryntih ia ka jingwanrah iaka synshar khaddar kaba jan bad ki paidbah, ban pynlong ia ka jinglah ban ioh ia ki jingthmu pynroi bad ban kyntiew ia ka jingbha jingmiat baroh kawei jong ki nong shong shnong haki nongkyndong” ula bynrap.
Haba kylli, u MLA u la ong ba kane Forum ka la ioh ia ka jingkukar kaba bha na u Symbud Myntri Rangbah ka Jylla
“Ngam bakla ban ong ba ki jingkular ba la ai da ka Sorkar ha ki por ba la leit noh kila sdang paw pyrthei, ki paidbah ki la iohi ia ki kam, ngam bakla ban ong ba ia kane ka jingtyrwa ruh ka Sorkar kan sngap bad da ka jingkyrshan na u Symbud Myntri Rangbah nga kyrmen ba ha ki sngi ban wan ngin sa iohi baka jingdawa Umden CRD Block kan urlong” ula ong.
 haka jingialam u MLA ka UDP na Nongpoh Bah Mayralborn Syiem ha ka sngi Ba-ar, kala phah tuklar ha u Symbud Myntri Rangbah ka Jylla Bah Prestone Tynsong ban pynsted noh ia ka jingpynkha iaka community & Rural Development (C&RD) block ha Umden Ri Bhoi.){kind=link}