Nongpoh, Naitung 15 : U MLA ka Nongpoh Bah Mayralborn Syiem, ula dawa ia u Chairman ka District Selection Committee (DSC), Ri-Bhoi, ba un pynmih noh ia ka result jong ka DSC bala dep thoh eksam naduh u snem 2020-21.
Une u MLA ula iakynduh markhmat ia u Chairman ka DSC uba dei ruh u Deputy Commissioner ka District Abhilash Baranwal, bad iakren halor ka jingpynrungkam ia ki samla na Ri-Bhoi ha ki kam bapher bapher ka DSC.
Haba kren sha ki lad pathai khubor, u Bah Mayralborn ula iathuh ba bun ki samla kila khmih lynti bad lynga mynsiem ha ka jingap ia ka DSC ban pynbna noh ia ka result thungkam kaba la dep pynlong eksam naduh u 2020-21.
Ula pyntip ba ula tynruh ia u Chairman ka DSC ba u dei ban pynmih noh ia ka result la kumno kumno ruh hapoh u bnai Nailar lane ha u bnai Nailur.
Nalor kane, ula pyntip ruh ba ula iakren halor ki kam kiba lait thylli hapoh ka District bad ong ba hadien bala dep pynbit pynbiang ia ka Roster System, ki bor District ki dei ban pynmih jingpynbna noh ba lait kine ki kam khnang ba ki samla kin ioh ban thep bad rung kam.
Une u MLA ula kyntu ruh ia u Chairman ka DSC ban iarap kyrpang ha kaban thungkam ia ki trai shnong ka Ri-Bhoi bad pynpaw ia ka jingkwah ba ha kiba bun ki kam ba lait ha Ri-Bhoi, dei ban ioh da ki samla kiba dei na Ri-Bhoi. “Ki lah ban dei u Khynriam, u Par, U Bhoi lane u War bad kiwei kiwei hynrei ki dei ban dei ki kiba shnong shnong ba pura jong ka Ribhoi” ula ong.
Kiba la iadonlang ha kane ka jingialang ki kynthup ia u Raja Braha, ADC, uba dei u Member Secretary ka DSC, u MDC ka Nongpoh Bah Balajied Rani bad u Bah Pul Star Nongrum, Dkhot ka DSC.
, Ri-Bhoi, ba un pynmih noh ia ka result jong ka DSC bala dep thoh eksam naduh u snem 2020-21.){kind=link}