Shillong, Nailur 19 :U Lamphang ka Iingdorbar Thaw Ain Bah Metbah Lyngdoh hynne ka sngi Nyngkong, ula kyrpad ia ka Sorkar Jylla ban leh burom lang ia i Kong (L) Mavis Dunn Lyngdoh, iba dei I Kynthei ba nyngkong ha India ban long I Myntri Sorkar, da kaba buh ia u motdur ba shi rynieng jong I ha Nongbah Shillong.
“Nga kwah ban kyrpad ia ka Sorkar ban ai jingmynjur ha kaban pynieng ia u motdur ba shiryngieng jong I Kong (L) Mavis Dunn Lyngdoh, ha phyllaw jong ka State Central Library bad ban leh burom ia ki matti bad ki jingshakri jong I ia ki paidbah ka Jylla” ong u Bah Metbah ha ka shithi bala phah sha u Myntri Rangbah ka Jylla Conrad Kongkal Sangma.
Haba iaroh ia ka jingpyrshang ka Sorkar Jylla ban rakhe ia ka jingdap 50 snem ka rta ha ka lynti kaba iphuh iphieng, u Bah Metbah ula ong ba kan bha ruh shibun ia ngi ban burom ia I (L) Mavis Dunn Lyngdoh, iba dei I Kynthei ba nyngkong ha India ban long I Myntri Sorkar.
Ka kam sain pyrthei jong I Kong (L) Mavis Dunn kala sdang ha u snem 1937, hadien ka jingshah jied kum I Dkhot jong ka Assam Legislative Assembly kum I kyrtong shimet bad I dei I kynthei ba nyngkong ha ka rta ba 33 snem ban bat ia kane ka kam, ula bynrap.
I Kong (L) Mavis Dunn Lyngdoh I dei I kynthei ba nyngkong ha India ban long I Myntri Sorkar. La kha ia I ha ka 4 tarik Jylliew 1906 bad I dei I Khun jong I Kong Helibon Lyngdoh bad Bah H Dunn. U Hynmen jong u Kpa jong I, Bah Edward W Dunn, u dei u Dkhot jong ka British Empire uba la ioh ia ka jingithuh halor ka jingshakri kum u Civil Engineer.
I Kong (L) Mavis i la pule ha Welsh Mission Girls; School, Shillong, ha Diocesan College bad ha Bethune College, Kolkata kaba I ioh ia ka BT Degree.
Katba i dang don ha Kolkata, i la iakynduh ruh ia u Mahatma Gandhi. I dei ruh I Kynthei Khasi ba nyngkong ban lah ban iasaid ain ne long nongiasaid ain hadien ba pass naka University Law College, Guwahati.
I Kong (L) Mavis i la jop ia ka elekshon MLA ha u snem 1937 bad ha u sne 1939, u Mohammed Syed Saadulla ula khot sngewbha ia I ban pyniasoh bad ka Sorkar Jylla kum I Myntri Sorkar bad bat ruh ia ka kam Myntri ka Tnad ka Koit ka Khiah ha kaba i la lah ban plie ia ka kam Nos ha ki Hospital Sorkar sha baroh ki kynthei kiba la dep hikai pyntbit.
I Kong (L) Mavis i la shah rem noh ha ka elekshon 1946 bad i la shongthait noh na ka kam sain pyrthei hynrei i la bteng pat ia ki kam trei monsngewbha.
Ine I Longkmie Khasi i la don ka jingiadei ba iajan bha bad ka Sorkar Assam wat hadien ka jingioh laitluid bad long ruh I nongaibuit ia ka. Hashuwa ki sngi ba khatduh jong I, i la leit kylleng ki Ri Sepngi bad ai jingkren ha US bad UK.
