Guwahati, Jylliew 24:U President ka Assam Pradesh Congress Committee (APCC), u Bhupen Borah hynne ka sngi u la phah da ka shithi sha u Eknath Shinde, u myntri ka sorkar Maharashtra ha ka ba u la kyrpad ia u ba un mih noh mardor na Assam ha ryngkat baroh ki MLA ki jong u.
U Shinde ha ryngkat ki 40 ngut ki MLA ki la don mynta hapoh Radison Blu Hotel, Guwahati na ka bynta ban pynkhyllem ia ka sorkar ba la lamkhmat da ka Shiv Sena hapoh Maharashtra.
“Phi tip bha ba ka Assam ka dei ka jaka ha ka ba ki briew ki ba ioh shibun ka jingiaroh halor ka akor ka burom bad ka jinglong jingim.Ka jingdon ka jong phi ha Guwahati ha ryngkat ki MLA jong ka party synshar Shiv Sena na Maharashtra ia ki ba la pynsah hapoh ka hotel halor ki jingkynnoh ia thied kuli ban pynkhyllem ia ka sorkar ha Maharashtra bad ka jingiai bteng jong ki lad pathai ban lum jingtip kam shym la long ka ba sngewtynnad na ka bynta ki nongshong shnong ka Assam.Nalor kata ka Assam mynta ka dang don hapdeng ka jingeh ka ba khraw namar ka jingsyllad jong ka jingshlei um,” pynpaw u Bora ha ka shithi.
Ha katei ka shithi la pynpaw ruh ba katkum ka jingioh jingkhein baroh ki la don haduh 107 ngut ki briew ki ba la khlad noh na ka jingshlei um bad ki jingtwa khyndew ki ba la jia naduh ka 6 tarik u Iaiong ba la dep, ha ka ba 65 na kine ki dei ki ba la khlad noh naduh ka 14 tarik mynta u bnai, katba palat 55 lak ngut ki briew ha ki 32 na ki 35 tylli ki district ki la shah ktah jur.
“Hapdeng ka ba kum kane ka jinglong jingman ha ka jylla, ka jingdon ka jong phi ha Guwahati bad ka jingbunkam jong ka sorkar Assam ban leh burom ia phi ka long ka bym sngewtynnad bad ka bym lah ban pdiang,” ong shuh shuh u Bora lyngba ka shithi.
Shuh shuh une u nongialam ka Congress u la ong ruh ba ka jylla Assam ka la shah pynjah burom da ka jingdon ka jong ki, kata da ka ba shim ia ka nongbah Guwahati kum ka jaka riehtngen ka ba biang tam na ka bynta ki MLA ki bym shym la burom ia ki kyndon ki ba iadei bad k riti synshar khadar jong ka ri.
