Shillong, Aug 8: Ka Kynhun bala ialam da u Myntri Rangbah ka Jylla Conrad K Sangma ha ka sngi Ba-ar, kala kyrpad ia u Myntri Rangbah Duh ka Ri Narendra Modi ba un tuklar lem halor ka jingdonkam ban pyntreikam noh mar mar ia ka Inner Line Permit (ILP) ha Jylla , ban pynrung ia ka ktien Khasi bad Garo ha ka 8th Schedule bad ban pynbeit noh ia ka jingiakajia pud bad ka Jylla Assam.
Kane ka kynhun na Jylla kala aiti ruh ia ka dorkhas ha u Myntri Rangbah Duh ka Ri ha ka jingiakynduh hynne ka sngi Ba-ar ha New Delhi. Kane ka kynhun ka kynthup ia u Lamphang ka Iingdorbar Thomas A Sangma bad ki Myntri ka Sorkar Jylla.
Kane ka kynhun kala pyntip halor ka resolution bala mynjur da ka Iingdorbar Thaw Ain ka Jylla ha u Nohprah 2019, kaba rai ban pyntreikam noh ia ka ILP ha Meghalaya. Ka kynhun kala kyrpad ia u Myntri Rangbah Duh ban tuklar lem naba ka Sorkar Jylla ka dang ap ia ka jubab na ka Ministry of Home Affairs (MHA) ba kan ai ia ka jing mynjur kat haduh mynta mynne.
U Myntri Rangbah ula ban jur ruh ia ka jingdei hok ban pynrung noh ia ka ktien Khasi bad Garo ha ka khyrnit ba phra jong ka Riti Synshar ka Ri. U pyntip ba ka Iingdorbar Thaw Ain ka Jylla ha u snem 2018, kala mynjur ia ka Resolution halor kane ka kam kaba dang sahteng mynta bad ka Sorkar India.
Halor ka jingiakajia khappud hapdeng ka Assam-Meghalaya, ka kynhun kala kyntu ia u Myntri Rangbah ka Ri ba un ai ka jingkyrshan ha kaban lah pynbeit noh sa ia ki hynriew tylli ki jaka bym pat pynbeit hapdeng ka Assam bad Meghalaya. Ha u snem 2022, kine ki arjylla kila iasoi ia ka MoU, kaba lam sha ka jingleit sorjamin lang ia ki jaka da baroh artylli ki Jylla.
U Myntri Rangbah ula pyntip ruh ia ka jingsngew jong ka Jylla halor ka Constitution (One Hundred and Twenty-Fifth Amendment) Bill, 2019, haba kdew ia ki jingsngewkhia kiba iadei bad ka jingthung ia ki jaidbynriew riewlum bym don nongmihkhmat ( un-represented tribe) sha ki Autonomous District Counci (ADC) ka Jylla Meghalaya. Ula pyntip ba ka Sorkar Jylla kala rai pyrshah ia kane ka jingthung nongmihkhmat ia ki Unrepresented Tribe hadien ka jingiasyllok kaba sani bha bad ki kynhun bapher bapher.
