Shillong, Nailur 17 : U Nongialam ka BJP bad Myntri Sorkar Bah Sanbor Shullai ha ka sngi Balang ula kyrpad ia ki paidbah ka Jylla ba kin ailad lem ia ka BJP ba kan thaw ia ka Sorkar ban pynthikna ia ka jingpyntreikam mardor ia ka Inner Line Permit (ILP) ha Jylla.
“Ka (ILP) ka dei ka mat ka Sorkar Pdeng. Ngi ju iakren ia ka man ka por. Haba nga leit sha Delhi, nga ju pynkynmaw ia ki Myntri bad ki Nongialam ha Delhi hynrei kam shong ha ka kti jong ngi. Kumta, kyrmen ba shisien ka sngi kine kiei kiei kin sa urlong khamtam nga kyrpad iaki paidbah ka Meghalaya balei ba kim ailem ka lad ia ka BJP bad ai ia ngi 31 ngut ki MLA. Na ka por sha ka por, ngi ju kyrpad ia kane. Ai ha ngi ia 31 ngut ki MLA bad ailad ba ngin thaw Sorkar san snem bad phin sa iohi ia kiei kiei baroh” ong u Bah Sanbor haba iakren bad ki nongthoh khubor.
U Bah Sanbor ula iathuh ruh ba ka BJP kala kala iaid ialap bad iakynduh bad ki kyrtong kiba don jing kyrmen ban jop ha kylleng ki jaka ka Jylla. Da ka jingpyrshang jong ka party ban jop bun seat, ula buh ia ka thong ban jop 8-10 seat ha ka elekshon ban wan.
“….ngi la dep sdang mynta la arsnem shiteng ban iaid ialap bad iakynduh ia ki kyrtong kiba don jingkyrmen ban jop ha Meghalaya bad halor ka jingbthah jong ki nongialam ka party ruh, ngi la iaid sha man ki jaka jong ka Jylla bad ngi la nang pynkhlain ia ka jingialap. Ngi don mynta sa arsnem shiteng bad ngi kyrmen ba, ngim lah ban ong ba ngin jop baroh 60 seat hynrei ngin jop 8-10 seat ha ka elekshon ban wan”.
Haba kylli, u Bah Sanbor ula ong ba ka BJP ka dangiakren ruh bad ki katto katne ki MLA jong kiwei pat ki party bad kyrmen ban lah khring noh ia ki sha ka party.
“Ngi dang iakren bad ki bad kyrmen skhem ba bun na ki MLA ba mynta kin sa wan iasoh sha ka BJP bad ban iakhun ia ka elekshon na ka party” ula ong.
Nalor kane, ula kam ruh ba ki paidbah ka Meghalaya kila sdang ban pdiang ia u Myntri Rangbah Duh Narendra Modi haba pynshong nongrim ia ki kam lyngba ki skhim pynroi bad ki prokram bapher bapher bala pyntrei da ka Sorkar Pdeng. Ula sot nuksa kum ia ka jingai marbam rashon ei, dawai ei bad jingkyrshan pisa sha ki nongrep, kaba la iarap bha ia ki paidbah.
Ula kren ruh halor ki jingkynnoh ba ka BJP ka dei kaba shun ia ki Khristan bad ba khang bam doh masi da kaba ong ba kine ki jingkam ki dei ki bym lah ban pdiang bad ki dei tang ki buit elekshon jong ki Liang Pyrshah.
 ha Jylla.){kind=link}