Shillong, Nohprah 17: U nongialam ka UDP bad u MLA ka Khliehriat u Bah Kyrmen Shylla hynne ka sngi Balang ula pynpaw ia ka jingskhem jingmut ba ka seng kan jop bha ha ka elekshon kaban wan.
“Ngi dang pynkhreh ialade bad ngi lah long kiba la pynkhreh ban iakhun ia kino kino ki jingtynjuh. Nga ngeit skhem ba ka UDP kan khur ia ka jingjop” ong u Bah Shylla bad ka banjur ia ka jingskhem jingmut ba ka seng kan jop beit.
Katkum ka jingkren u Bah Shylla, ula ong ba ka jingleh bha ka seng kan dei kaba pyni ia ki dak ki shin jong ka jingkiew ne jinghiar.
“Ka result kan sa batai baroh. Ngi dang don ha ka lynti ban pynkhreh ialade bad ngi lah long kiba la khreh ban iakhun,” u la ong.
U Bah Shylla u la banjur halor ka jingdonkam ka jingkyrshan ki paidbah da kaba ong, “Ngi donkam ia ki paidbah ban sngewthuh ba bun na ka por ki khmih lynti ba ka UDP kan leh bha hynrei ba ngin leh ia kata ngi donkam ka nombar. Kumta ngi kyrpad ia ki paidbah ba kin ailad ia ngi ban jop kham bun khnang ba ngin lah ban leh bha. Bad lada ngim lah ban trei bha, ki paidbah ki lah ban kynnoh ia ngi bad ngi ngin sa pdiang ia kata.”
U Nongialam ka UDP ula kren ruh halor ka jingbuh jingma, “Ban long ka jingma ne ban shah byrngem ha kino kino, shisien ba la rung ha ka kam politik baroh ki seng sain pyrthei kin don iala ka rukom treika bad ban pynkhreh ialade. Kaba lah pat ban long ka jingma ia kiwei pat.
Shuh shuh ula pynkut da kaba ong, “Ngi khmih lynti ba ki paidbah kin ai ka lad ia ngi, lada kam dei mynta ka sngi, lehse kan dei lashai, hynrei ha kawei ka sngi ki paidbah kin sa sngewthuh bad kin sa ai ka lad ia ka UDP ban ialam ia ka sorkar bad ngin sa pynshisha da ka kam kaba ngin trei”.
