Shillong,Naitung 22: U Chairman ka All India Power Engineers Federation, u Shailendra Dubey u la kyntu ia u Myntri Rangbah ka Jylla, Conrad K Sangma ba un kyrpad ia u Myntri Rangbahduh ka ri ban ym pat rah ia ka Electricity (Amendment) Bill 2022 ha Parliament khlem da ia syllok lang shwa bad ki engineer ka tnad Bording.
Ia kane u Chairman ka Federation u la kren ha ka General Conference kaba 14 jong ka MeECL Engineer Association kaba long hynne ka sngi ha Pinewood Hotel, Shillong.
“Ngi kyntu jur ia u Myntri Rangbah ka Meghalaya ba un ia kren lem ia kane ka mat bad u Myntri Rangbahduh ka Ri ryngkat bad kiwei pat ki Myntri Rangbah,” ong u Dubey haba kren bad ki lad pathai khubor hadien ba la wai ka Conference.
Katkum ka jingong jong u, kiba don bynta hakhmat eh ha ka tnad Bording dei ki paidbah nongpyndonkam bad ki nongtrei ka tnad bording.
“Tad haduh mynta ka sorkar pdeng kumjuh ka Ministry of Power kam pat khot satia ia ka jingiakren la ka long ia ki kynhun jong ki nongpyndonkam bording lane ia ka kynhun jong ki nongtrei ha ka tnad bording halor katei ka jingthmu ban wanrah jingkylla noh ia ka ain Bording ba la tip kum ka Electricity (Amendment) Bill 2022,” u la ong.
Shuh shuh u la ong ruh ba lada ia katei ka Bill ki thmu ban wanrah ha ka Parliament khlem ka jingiatai ne syllok lang bad ki nongtrei ka tnad, kan long kum ka jingpynkheiñ ia ka jingkular ha kaba na ka liang jong ki ruh kin pyrshah jur.
Ha kajuh ka por ka Synjuk ki Engineer ka tnad Bording ha ka jylla hapoh ka lama jong ka National Coordination Committee of Electricity Employees & Engineers (NCCOEEE) Meghalaya Unit ruh ki la shim lang ia kajuh ka rai ban pynsawa lang ia ka jingpyrshah
Katei ka kynhun ka ong ruh ba lada jia ba ki rah beit ia ka ha Parliament na ka liang ki 27lak ki nongtrei ka tnad kin pynlong ka jingpyrshah kaba jur.
Haba kren pat halor ka jingthmu jong ka sorkar jylla ban pyndait noh da ku smart meter u Dubey u la ong ba kane kan ktah ia ka iohkam iohkam jong bun ki samla ba ju leit buh jingthoh ia ka jingiaid ki meter lane ki meter reader kumjuh ruh ia ki nonglum ia ka bai bording namar baroh kan sa treikam beit da ki kor internet suda.
