Shillong, Naiwieng 13: Ka tnad ka koit ka khiah jong ka jylla ha ka sngi Nyngkong, kala pynpaw ba kala phaikhmat bha sha ka bha ka miat jong ki Nongtrei ka Koit ka Khiah ba hakhmat duh ne ki Frontline Workers haba kyrpad ia ki nongtrei Accredited Social Health Activist (ASHA) ba kin bteng ban ai ia ka jingshakri jong ki ia ki paid nongshongshnong ka Jylla khlem kano kano ka jingthut.
Kane ka jingkyrpad kala mih hadien ba ki nongtrei ASHA kila rai ban pynlong ia ka jingsangeh treikam ba khlem pud naduh ka 7 tarik Naiwieng, kum ka dak ban pynpaw ia ka jingpyrshah halor ka jingleh mynthi jong ka Sorkar ia ki jingdawa jong ki ASHA ba kynthup ia ka jingpynkiew ia ka jingsiew.
Ha ka kyrwoh, u Joint Secretary ka Tnad TG Momin ula ong ba ka Tnad ka sngewkhia bha halor ka jingshim jong ki nong trei ASHA ia ka sienjam ban sangeh treikam.
U TG Momin ula pynpaw ba ka sorkar jylla ha ki snem kiba la leit, kala shimkhia ia ki mat jingdawa jong ki ASHA. Ka jingpyntreikam ia ka “ASHA First” ha kaba iaidei bad ka jingsiew ia ka jingioh ki ASHA lyngba ka National Health Mission (NHM) kala long kaba kongsan ha kaban pynthikna ba kin ioh ia ka jingsiew kaba kloi bad ha ka por kaba dei. Lah ban kdew ba ki ASHA kiba lah ban treikam bha ki lah ban ioh iaka jingsiewk ba kot haduh T.7000 haduh T.8000 shi bnai.
“Naduh ba la sdang ha u Risaw 2022, ka tnad sorkar kala siew thikna ia ka jingsiew kaba pyni shai ia ka jingkitkhlieh ha kaban pyllait mardor ia ka pisa halor ka jingtrei shitom jong ki nongtrei ASHA, ka jinglut jingsep kaba kot T.21.89 Klur la dep ban pyllait lyngba ka aplikeshon ha ki 12 bnai kiba la dep bad baroh ka pisa kaba la pyllait ha ki 18 bnai kiba la dep kala kot sha ka T.34.50 Klur” la pynpaw ha ka kyrwoh.
Nalor kane ka jingsiew kaba sahteng jong ka Meghalaya Maternity Benefit Scheme (MMBS) bad Meghalaya ASHA Benefit Scheme (MABS) kaba kot T.53 Klur kaba la sahteng naduh u snem 2013, la dep ban pyllait ha baroh kawei ka jylla ha u snem mang tyngka 2021-2022.
U Momin ula pynpaw ba ka sorkar jylla kala airuh iaka jingsiew kaba T.2000 ia baroh ki ASHA hapoh jong ka State Scheme, da kaba ithuh ia ka jingiakynduh jingeh ka jongki ASHA bad mynta ki ASHA ki ioh pdiang iaka jingsiew ka jongki wat ha man la ka taiew katkum ka jingkam ka jongki lyngba ka App.
Lah ban kdew ba ha ki jaka kiba jynjar ban iaid ne poi, ka sorkar jylla kala pynkhamti ruh ha ka Village Health Council (VHC) ban pyndonkam da ki Trained Community Nurses (lada don), kiba lah ban ai ka jingshakri haka jingai jingsumar ia ka imlang sahlang bad katei kaj ingtyrwa mynta ka dang iaid shakhmat.
Ka long kaba kongsan ban pynpaw ba ki ASHA ki long kiba donkam ha kaban ai ka jingsumar sukher bad kano kano ka jingpyndik jingpynthud iaka jingai jingshakri ka jongki kan long kaei kaei kaban ktah jur iaka koit ka khiah haka imlang sahlang.
