Guwahati, Nailur 09: Ka Kynhun Myntri ka Sorkar Assam ha ka sngi Thohdieng, kala rai ban ai jingthoh ba ai jingmut ia ka Sorkar Pdeng ba kan weng noh ia ka Disturbed Areas Act bad Armed Forces Special Powers Act (AFSPA) na ka Jylla baroh kawei.
Kane ka rai kala mih tang da ki sngi hadien ba u Myntri Rangbah ka Jylla Himanta Biswa Sarma ula iakynduh ia u Myntri kam Pohiing ka Ri Amit Shah ha New Delhi, ban iakren halor ka jingtyrwa jong ka Sorkar ban weng noh shisyndon ia ka AFSPA na Assam.
Haba iakren bad ki nongthoh khubor hadien ka jingialang jong ka kynhun Myntri, u Himanta Biswa ula ong “Ngi la rai ban kyrpad ia ka Sorkar Pdeng ba kan weng noh ia ka AFSPA n aka Jylla baroh kawei. Hynrei, ngin iaid beit kat kum ka rai ban shim da ka Sorkar Pdeng khamtam ka Home mInister namar haba kut, ka Sorkar Pdeng kan peitthuh kat kum ka jinglong jingman”.
Ka jingpynbna ia ka ‘Disturbed Area kala treikam naduh u snem 1990 ha ka Jylla baroh kawei. Ha ka 1 tarik Iaiong, 2022, ia ka AFSPA la weng napoh ka Jylla Assam lait noh tang ha ki khyndai tylli ki Disrrict kynthup kawei ka Sub Division. Naduh ka 1 tarik Iaiong, ki district kiba dang hap hapoh ka AFSPA ha Assam kila hiar sha ka 8 tylli namar ka jingweng noh ia kane ka Act n aka Lakhipur Sub Division jong ka Cachar District.
Ka jingweng noh ia ka AFSPA n aka thain Shatei Lam Mihngi ka dei kawei na ki jingkular jong ka BJP. Kat kum ka jingbuh jingthoh ka Home Ministry la pyni ba ha kine ki phra snem bala leit noh, kala don haduh 76 % ka jingduna ha ki kam kaikhlaw hapoh ka thain Shatei Lam Mihngi.
