Donkam ia ki seng kali tourist ban wan lang noh ha kawei ka lama
Shillong, Risaw 16 : Ka Meghalaya Tourism Development Forum (MTDF) kala ban jur ia ka jingdonkam ba ka Sorkar kan wanrah ia ka Policy ba treikam slem, ha kaban kyntiew ia ki kam jngohkai pyrthei ha Jylla haba kyrpad ia ka Sorkar Pdeng ban mynjur ha ka ban wanrah ia ka High Speed Luxury Rail Network (lynti rel) ban pynduna ia ka por ka leit ka wan na Guwahati sha Shillong.
Kala pynpaw ruh ia ka jingdonkam ba ki seng jong ki tourist taxi kin wan lang noh hapoh kawei ka lama ban pynbeit ia ki jingeh ba ki iakynduh.
Haba aiti ia ki jingai jingmut ba 9 tylli ki mat sha ka Committee bala thaw da ka Sorkar kaba khlieh da u Director ka Tnad Tourism Bah Cyril Diengdoh, u President ka MTDF Bah Larsing Sawyan ula ong “Ka policy kaba treikam bun bun snem kan iaid na ka bynta ban kyntiew bad ka jingroi jongki kam jngohkai pyrthei hapoh ka Jylla”.
Ka jingdonkam ba mynta ka dei ka jingtreikam pura jong ka Shillong Airport khnang ba ki nongleit jongwan kin lah ban wan beit beit nala ki jong ki Sor sha Meghalaya.
“La antad ruh ba ha kane ka shiphew snem ban wan, ka Guwahati International Airport kan dei kaba la pyniasoh sha baroh ki sor bah jong ka Asia, kaba pynlong ia ka Sor kaba iasoh bad baroh ki jaka sorbah jong ka pyrthei. Ka Meghalaya ka dei ban pdiang ia ka jingmut jong ka Vande Bharat Train kaba pyniasoh ia ka Borjhar Airport sha Shillong bad kyrpad ia ka Sorkar India ban mynjur ha kaban wanrah ia ka High Speed Luxury Rail Network ka ban pynduna ia ka por ha ka leit ka wan na Guwahati sha Shillong. Kane kan nang pynkhlain ha kaban pynlong ia ka Meghalaya ym tang ka jaka jngohkai kaba khring ia ki nongshongshnong ka Ri hynrei ia kiba nabar ri ruh kumjuh” ula ong.
U Bah Larsing ula ong ba ki jingiakhih ba dang shen da ki katto katne ki seng ki tourist taxi ka Jylla, kala ktah bha ia ka jingwan ki nongshangkai pyrthei ha u bnai Naitung haduh u Nailur 2024, kaba wanrah ia ka jingduhnong ki hajar hajar ngut ki kynhun ba trei kam jngohkai kum ki hotel, ki guest house, ki guides, ki restaurant, ki dukan sha, ki nongrep bad ki nongdie jhur.
“Namar kata, la kyrpad ba hadien habud ba ki nongpyniaid ia ki kali Tourist ki dei ban iasyllok bad kiwei pat ki kynhun ba trei kam jngohkai ha Jylla shuwa ba kin shim ia kano kano ka rai kaban ktah ia ka kam jngohkai” ula ong haba iai ban “Ka MTDF ka pyrshah jur ruh ia kano kano ka jingthmu ban khang ia ki kali tourist na Assam namar kane kan sa ktah bha ia ka jingroi ka kam jngohkai ha Meghalaya hadien habud”.
Ha kajuh ka por, ka MTDF kala kdew ruh ba ka jingdon bun palat ki seng jong ki kali tourist ha Khasi Hills ka dei kaba ktah bha ia ki.
“Ka Committee ka lah ban pynkohnguh ia ki seng jong ki kali taxi ba kin wan lang noh hapoh kawei ka lama ban iapynbeit lang ia ki jingeh bad ia ka bha ka miat jong ki” ong u Bah Larsing ha ka shithi.
Ka MTDF kala kyntu ruh ia ka Committee ban ai jingmut ia ki kyndon kiba pyrrkhing bha bad ka jingdain kuna ia ki kali shimet kiba kamai beain kum ki taxi ha Meghalaya.
Ka MTDF kala kyrpad ruh ia ka Committee ban ai jingmut lem ha kaban shna ia ka website na ka bynta ki kali tourist lane pynmih da ka App ka ban kyntiew kyrdan ia ka jingkamai kali tourist bad plie lad ruh ia ki kali tourist ban kham ioh kamai lyngba ka online booking.
