Ong u DyCM ba jan mar shiteng ka shnong kin hap shabar ka jingker
Shillong, Jylliew 17 : U Symbud Myntri Rangbah ba khmih ia ka kam Pohiing Bah Prestone Tynsong ula kyrshan ia ka project ker sainar shah ha khappud jong ka Sorkar Pdeng bad kyrpad ia ka Sorkar ba kan pynbeit thymmai ia u pud ban thung jingker ha ka shnong Lyngkhong bad Raid Nongskhem namar ka jingker kala phiah ia mar shiteng ka shnong bad pynduh ia ki jaka rep.
Haba pynshai ia ka nongrim jong ka Jylla, u Bah Prestone ula ong “Ki paidbah ka Jylla kim don ka jingpyrshah ia ka jingker sainar. Ka jingker sainar ha khappud ka dei kaba hap ban leh bad ka long kaba donkam bha”.
Ula pynsngew ia ki jingeh kiba mih na ka jingpynbeit ia ka jaka kiba dei ban pyniaid ia ka jingker ba mynta.
“Ha ka jingker sainar, kaei kaba jia, kum ka nuksa, katto katne ki shnong kum ka shnong Lyngkhong bad katto katne kum ka Raid Nongskhen, jan mar shiteng na ka shnong kila don shabar ka jingker. Kaba ar ka long, ki jaka rep ba ki ju pyndonkam manla u snem ruh kila hap shabar jong ka jingker” ula ong.
U DyCM ula pyntip ba ia kane ka kam lah dep ban iakren hapoh ka Sorkar Jylla bad yn sa rah iakren shen sha Delhi.
“Ngi kwah ruh ban pyntip sha ka Sorkar India halor kane ka mat. Lada long kaba lah, ngi kyrpag ia ki ba kin kham hiar sharum, lehse shajan u zero line, khnang ba ki jaka ba ngi don bad bala pyndonkam ha ka rep ka riang kin ym shuh duh ei. Hooid, ngin sa iakren bad ka Sorkar Pdeng” bynrap u Bah Prestone.
