Shillong, Nailar 17: Ka Kynhun ka KHADC ba ialam da u Chief Executive Member (CEM) ka Khasi Hills Autonomous District Council (KHADC) ha ka sngi Palei, kila kyrpad ia u Lat ka Jylla Phagu Chauhan ba un ai jingmynjur ia ki Bill bapher bapher jong ka Council.
Haba iakren bad ki nongthoh khubor hadien ka jingialang, u CEM ula pyntip ba ka Expert Committee bala thaw da ka Sorkar Jylla, dang shen kala pynphai biang haduh 8 tylli ki Bill sha ka Council ryngkat ka jingpan jingpynshai shuh shuh halor kine ki Bill.
Napdeng kine, 7 tylli ki Bill ki dei jong ka Elaka Administration kiba dei naduh ki Shnong ki thaw haduh ki Hima bad ka KHAD (Social Custom of Clan Administration) Bill.
“Ngi la pynpaw ia ka jingsngewkhia hakhmat u Lat bad mar syndep pynbeit ia kine ki Bill, ngin sa phah biang ia ki (8 tylli ki bill) sha u Lat bad ngi la kyrpad ia u ba un ai jingmynjur noh ia kine ki Bill ba kin long ain” ula ong.
“Ngi da kmen shisha ba u Lat ula pynpaw ia ka jinglong ba kloi ban ai jingmynjur ia kine ki Bill ynda kila poi sha u bad ruh ban don ka jingiadei kaba iajan bad ka KHADC” ong u CEM haba bynrap ba u Lat ula pynpaw ruh ia ka jinglong ba kloi ban wan plie ia kawei na ki project nongkynti jong ka KHADC, ia kaba la pyntrei na ka song pisa jong ka Sorkar Pdeng.
Kane ka kynhun ka KHADC kala ai khublei ruh ia u Lat ka Jylla halor ka jingai jingmynjur ia ka Khasi Hills Autonomous District (Establishment, Management, and Control of Markets) (Second Amendment) Regulation Act, 2021 bad ia ka Khasi Hills Autonomous District (Regulation and Administration of Land) Bill, 2021.
U Bah Pyniaid ula pyntip ba shen ka KHADC kan sa thaw noh ia ki Rule ban pyntreikam ia ka Market Regulation Act, ka ban iarap bha ha kaban weng ia ki jingeh jong ki nongrep jong ki 5 tylli ki District kiba hap hapoh u pud u sam jong ka Council.
Ula piathuh ba ka Council kan sa buh ruh ia ka Minumum Support Price bad kan pynthikna ha kaban khang noh shisyndon ia ka jingot kilo ia ki marrep haba wandie sha Iew nangne shakhmat.
U Deputy CEM Bah Pynshngain N Syiem ula ongba ka Counci ka da sngewnguh shisha ia ka Sorkar MDA halor ka jing phah ia ki Bill ban ioh jingmynjur na u Lat.
“Ngi da sngewnguh ia ka Sorkar Jylla halor ka jingthaw ia ka Expert Committee. Kino kino kiba ngim lah ban sngewthuh, ngin sa iashong lang hapdeng ka District Council, ka Sorkar bad ki Ophisaw ka Tnad Ain khnang ba kine ki bill ba pass kin ym slem shuh ha kaban ioh ia ka jingmynjur” ula ong.
Halor ki bill ba pynphai sha ka Council, u Bah Pynshngain ula ong “Ngin sa ai noh shen ia ki jingpynshai bad ngin sa phah biang ia ki (Bill) sha ka DCA. Ngi la dep iakren ia u Lat ba un sngewbha ban ai mynjur ia kine ki Bill jong ngi khnang ba un nang pynkup bor ia ki paidbah ym tang ha ka roi ka par hynrei ruh da ka ain namar ha kine ki sngi ba mynta khlem ka ain ka kanun, ngin ym lah ban iada ialade”.
