Shillong, Nailar 10 : Ka Hynniewtrep Youth Council (HYC) hynne ka sngi Palei kala kyntu iaka sorkar jylla ban shim ia ki lad ki lynti ban buh ar tylli ki projek pynmih bording ha South West Khasi Hills District.
Ha ka dorkhas kaba la aiti sha u Myntri ka tnad Bording u AT Mondal, u President ka HYC-SWKH u Arbok Kharjahrin ula ong, “Ngi kyrpad ia phi ban shim ia ki lad ki lynti ban sdang biang iaka Rangmaw Hydel Project bad ka Kynshi Hydel Project Stage-2 mardor na ka bynta ka bit ka biang jong ka jylla baroh kawei”.
Ula ong, ba ka sorkar jylla ha u 2010, kal aiasoi iaka Memorandum of Agreement (MoA) bad ka Sew Energy Ltd ban pyntreikam iaka 65MW Rangmaw Hydro Electric project, hynrei ha u 2020, ia katei ka MoA la pynkut noh bad ka mshym la don shuh kano kano ka jingshimkhia ban pynkhie im biang ia kane ka projek.
“Ngi don iaka jingsngew ba ka Rangmaw Hydel Project kadei kawei na ki projek kaba kongsan hapoh ka South West Khasi Hills District bad lada ia kane ka projek lah ban pynurlong shisha kan long ka jingyrkhu kaba khraw ia ki paidbah ka District bad ia ka jylla baroh kawei” ula ong.
U Bah Kharjahrin ula ong ruh ba ka Sorkar Jylla kala dep ban soi iaka MoA bad ka Jaypee Meghalaya Power Ltd, New Delhi ban tei ia ka Kynshi stage-II HE project (325 MW) .
Hynrei ia kane ka projek la pynkut noh da ka sorkar jylla hadien ba ka kompani kala pynpaw ba kam lah ban iaid shakhmat bad katei ka projek bad kumba paw ha ki lad pathai khubor, la pynkut noh namar ka jingdon u Uranium ah katei ka thain.
“Ngi ngeit skhem ba kane ka projek ka long kaba kongsan bha ia ka District bad ka jylla baroh kawei bad ngi kyrpad ia phi ban shim ia ki sienjam ban sdang ban pyniaid shakhmat biang kham kloi ia kane ka projek” ula ong.
U Nongialam ka HYC ula ai jingmut ruh ia ka sorkar jylla ban sdang iaka Thermal Power Plant ha ka district kaba riewspah kyrhai ha ka jingdon u dewiong kaban ai jingmyntoi iaka jylla baroh kawei ha ka jingpynmih ia ka bording elektrik bad kan iarap ruh ia ki briew kiba don bynta ha kam khaii dewiong bad kan long ruh kum ka lad ban aikam aijam ia ki briew kiba jong ka district.
Ha kawei pat ka liang, ka HYC kala kyntu ruh iaka sorkar jylla ban buh sa kawei ka C&RD Block ha ka district, ia kaba mynta hi ka don iaka Ranikor bad ia ka Mawkyrwat Block.
U Bah Kharjahrin ula ong, ba ia ka Block kaba thymmai dei ban don ha Wahkaji ne ha ka thaiñ Umdohlun, ki briew kiba shong basah ha Wahkaji, Phalngdiloin, Myriem, Warsanlyngdoh bad kiwei kiwei, kila mad ia ki jingeh kiba khraw namar ba kitei ki jaka ki jngai bah na ka Ranikor bad Mawkyrwat.
