Shillong, Nailar 31 : Ka Iingkashari Meghalaya High Court kala kyrpad ia ka Supreme Court ba kan ailad ha kaban tian bishar ia ka Public Interest Litigation (PIL) da kaba kdew ba ka kam ksew ba iaid wir ha Meghalaya ka kham pher namar ka jinglong ba shyrkhei jong ki ksew, kaba buh ha ka jingma ia ka jingshngain ki paidbah.
Kane ka rai jong ka Iingkashari kala mih hadien ba ka Supreme Court kala bthah ban phah lut ia ki PIL halor ki ksew iaid wir na baroh ki Iingkashari High Court sha ka ba kan bishar.
Ka division bench ba kynthup ia u Chief Justice IP Mukerji bad Justicw W Diengdoh ha ka hukum ba pynmih haka sngi Saitjain (30 tarik Nailar) ka ong “Watla ki don bun kiei kiei kiba long kumjuh hapdeng ka mudui ba iadei bad ki ksew iaid wir ha ki Iingkashari High Court bad ha Supreme Court, ngi sngew ba ka dei ka kamram jong ngi ban kdew hangne ba ha kane ka Jylla, ka don ka jingiapher ha ka jingma kaba ki buh da ki ksew iaid wir.
“La pyntip sha ngi ba bun na ki ksew iaid wir ki dei ki ksew dait briew bad kiba kynrup kulmar. Ha surok, lynti iaid bad jaka paidbah, ki kynrup kynsan kynsan ia ki briew bad ha bun ki khep ki pynmynsaw jur. Haba dep sngap ia ki jingpyntip ha kane ka PIL, ngi sngew,nalor kiwei pat, bthah ban kem iakine ki ksew da ki bor Sorkar, ban ai dawai, injekia ki bad sa buh ha ki jaka sah ba shna kyrpang ia ki ban ioh peit thuh shuwa ban pyllait pat ia ki. Namar ka jinglong jong kine ki ksew, ban pyllait ia ki khlem ka jingsngewhun ba kim dei shuh kiba dait briew, bad ailad iaki ba kin iaid ha ki jaka paidbah, kan buh ha ka jingma ia ki paidbah”.
“Namar kine kiei kiei, ngi bthah ia u Registrar General kane ka Iingkashari ba un phah ia ka aplikeshon bad pan ia ki jing bthah haba iadei bad ka jingailad ban shong bishar ia ka PIL ha kane ka Iingkasahri” kala ong.
Ia kane ka PIL yn sa buh ban wanrah biang ha ka 15 tarik Risaw, 2025, ban ioh pdiang ia ka kaiphod na u Registrar General halor ka jingmih jong ka aplikeshon bala phah sha ka Supreme Court.
 da kaba kdew ba ka kam ksew ba iaid wir ha Meghalaya ka kham pher namar ka jinglong ba shyrkhei jong ki ksew, kaba buh ha ka jingma ia ka jingshngain ki paidbah.){kind=link}