Shillong, Naitung 23 : U Myntri barim ka Tnad Pule Dangle bad MLA ka Amlarem Bah Lahkmen Rymbui, ula pynpaw ia ka jingkyrmen ba mang tyngka 2024-25 jong ka Ri kan wanrah ia ka jingkylla kaba khraw ia ki jaka nongkyndong bad kan plie lynti ban iakhun ia ka jingbym iohkam iohjam.
Ka Myntri Pla tyngka ka Ri Nirmala Sitharaman kala wanrah ia ka mang tyngka ba pura jong u snem mang tyngka 2024-25 hynne ka sngi Ba-ar kaba dei ruh ka mang tyngka ba 7 ba kan wanrah ma ka.
U Bah Lahkmen ula ong “Ka mang tyngka bala wanrah hynne ka sngi ka dei ka jingpynbteng ia ki sien jam jong ka Sorkar India bad u Myntri Rangbah Duh ha kine ki shiphew snem bala leit bad thmu ban kyntiew ia ka Ri baroh kawei”.
“Watla ka mang tyngka kan nym pynhun ia baroh, ka mat ba sngewkhia eh ki briew ka dei ka jingbym iohkam iohjam. Da ki sienjam bapher bapher jong ka Sorkar, khamtam ban wanrah ia ki jingtei bapher bapher, nga kyrmen ba kane kan plie lynti ia ki samla la ka dei ha ka iohkam iohjam ne ha kano kano ka dur” ula ong.
U Bah Lahkmen ula kren halor ka jingpynheh ia ka jingpynlut ha ka Mahatma Gandhi National Rural Employment Guarantee Act (MGNREGA), bad ong ba “ka dei ka budlum ki kam pynroi ha ki shnong ki thaw.
Ula pynpaw ia ka jingkyrmen ba kane ka jingpynheh ia ka mang tyngka kan lam sha ka jingkylla dur kaba shisha jong ha ki shnong nongkyndong.
Halor ka mang tyngka sha ka pule puthi, u Bah Lahkmen ula kdew ba ka dei ka jingpynkiew khyndiat ia ka mang pisa bad banjur ia ka jingdonkam ban ai kham bun ka jingkyrshan na ka Sorkar Pdeng.
“Ka pule dangle ka don ha ka khep ki jingkylla da ka jingpyntreikam ia ka New Education Policy (NEP) ha kine ki saw snem bala leit. Ki don shibun kiei kiei ha ka kam pule dangle kiba ka Sorkar Jylla ki donkam ia ka jingiarap ka Sorkar Pdeng ban leh eiei ia ki” ula bynrap.
U Bah Lahkmen ula pynpaw ruh ia ka jingsngewkhia halor ka thain Shatei Lam Mihngi,haba kdew ia ka jingbym don ka jingbatai shai ha ka mang tyngka.
“Ngi donkam shibun ki lad ai jingsumar, shibun ki jingdonkam ha ki jaka pule, ka song pisa sha ki nongsengkam bad ban pynshlur ia ki karkhana trai shnong ba kin pynkylla dur ia ka thain” ula ong.
, bad ong ba “ka dei ka budlum ki kam pynroi ha ki shnong ki thaw.){kind=link}