Shillong, Lber 25: U MLA ka UDP na Mawsynram Bah Olan Sing Suin u la pynpaw ia ka jingkyrmen ban lah plie noh shen ia ki border haats hapoh ka constituency jong u, hadien ka jingkhang khyrdep namar ka jingkulmar ha Bangladesh.
Haba kren sha ki lad pathai khubor ha ka sngi Ba-ar, u Bah Olan Suin u la ong, “Ngi don ar tylli ki iew khappud ha Mawsynram, kawei ha Lalpani bad kawei pat ha Ryngku. Ia kine ki iew ne haat la khang kumba shisnem mynshwa namar ka jinglong jingman ha Bangladesh, kaba la wanrah ïa ka jingsngewkhia halor ka jingwan tuid bad jingwan rung tuh jong ki nong Bangladesh. Ka sorkar ka la shim ia ki lad jingiada ban khang ia ki jaka khappud na ka bynta ka jingshngain ki paidbah ka thain.”
Hynrei da ka jingdon ka sorkar thymmai mynta ha Bangladesh, u Bah Suin u la pynpaw ba u don ka jingkyrmen ban sdang biang ki kam khaïi ba man ka sngi.
