Shillong, Iaiong 30: U Nongialam ka seng United Democratic Party (UDP) u Bah Kyrmen Shylla hynne ka Sngi Baar, ula ong ba ka long kaba eh ban batai lypa mano ban jop ia ka elekshon MP na ka jylla hynrei u kyrmen ba uno uno u ban jop yn trei na ka bynta u paidbah ka jylla.
“Katkum ka jinglum jingkhein, ka long kaba eh bha ban ong eiei ne ban iathuh lypa kumba ka long, hynrei kan shong pat iano phi buh ia ka jingkylli, lada phi kylli ia kiwei kiwei ki seng saiñ pyrthei bad lada phi kylli ia ka UDP bad ia nga, ngan ong ba kan jop ka UDP.
Hynrei lada phi kylli ia ki briew naka Congress un kam ba kan jop ka Congress bad lada phi kylli ia ka VPP, NPP ne ki kyrtong khlem seng kin kam ba kin jop ma ki ia ka elekshon” ong u Bah Kyrmen Shylla.
“Ka jingniew vote kan dang shim por bad ka long kaba eh shibun ban iathuh lypa, hynrei nga ngeit uno uno uba jop ia ka elekshon, ngin khmih lynti ia kaba bha bad katkum ka jingkyrshan jong ki paidbah u nongjop yn dei uta uban trei na ka bynta ki paidbah bad un burom ia ka vote kaba u ioh” la ong u Bah Kyrmen.
Haba kylli haduh katno ka kynhun Regional Democratic Alliance (RDA) ka skhem jingmut ban jop ia ka elekshon, u Bah Kyrmen ula ong, “Ka jingjop ne jingrem kam dei satia ha ki kti jong ngi hynrei ngi la trei shitom bha ban jop ia kane ka elekshon. Ngi lah iohi ba baroh ki MLA kila trei shitom bha 100 na ka 100 hynrei ha kaba khatduh hi kan shong ha u paidbah iano un jied”.
Une u nongialam ka UDP ula ai khublei ia baroh ki MLA ha ka kynhun RDA kiba la trei shitom bad kane ka pyni ia ka jingiatylli bad ha ki snem kiban dang wan ruh kin bteng ban iatreilang da ka jingiatylli.
U Bah Kyrmen uba long u Myntri ka Sorkar Jylla ula kubur ba ki katto katne ki nongkyrshan ka UDP kila leit ban kyrshan noh ia kiwei pat ki seng saiñ pyrthei hynrei wat kiwei ruh kiba dei na kiwei pat ki seng saiñ pyrthei kila wan ban pyniasoh noh bad ngi ka UDP.
Haba kylli halor ka jingshlei u paidbah ha man ki jingialang ialap elekshon ka VPP, u Bah Kyrmen ula ong, “Tang ki briew kiba leit ha ki jingialang elekshon kam pat dap ban jop ia ka elekshon hynrei donkam haduh 2 lak shiteng ne 3 lak tam ban jop ia ka elekshon”.
“Kiba bun ki seng saiñ pyrthei kiba la pynlong ia ki jingialang paidbah, la shem ba u paidbah uba poi ym shim la poi tang shi lak ruh. Ngim lah ban ong ba tang na ka jingbun briew kin lah ban kam ba kin jop noh ia ka elekshon namar donkam ban ioh ia ka jingkyrshan ym tang na kiba wan sha ki jingialang hynrei wat na kito ruh ki bym mih ban iahsimbynta ha ki Rally ne jingialang paidbah” ula bynrap.
U Bah Kyrmen ula ong, ba u ngeit skhem ba ki paidbah kiba mih ha ki jingialang bad wat kito ki bym mih haka jingialang, ki ieid bad ki shaniah iaka UDP bad kumta da ka jingieid bad jingkyrshan ka jongki ia ka seng UDP kane kan ai bor ban iakhun shuh shuh ia ki elekhson kiban dang wan.
 u Bah Kyrmen Shylla hynne ka Sngi Baar, ula ong ba ka long kaba eh ban batai lypa mano ban jop ia ka elekshon MP na ka jylla hynrei u kyrmen ba uno uno u ban jop yn trei na ka bynta u paidbah ka jylla.){kind=link}