Shillong, Rymphang 03: U kyrtong ka National People’s Party (NPP) na Nongkrem konstitwensi u bah Dasakhiat Lamare u la pynpaw ia ka jingsngewskhem ba un ioh ia ka jingjop na Nongkrem Constituency ha kane ka elekshon MLA-2023 haba ther tyngeh ruh ia kiba kynnoh ba u pyndonkam da ka bor pisa ha kane ka elekshon ban thied ia ki nongthep vote.
U Bah Dasakhiat uba dei u MLA ka Mawhati bad rai ban iakhun noh na Nongkrem ula ong “ Ki paidbah kin vote ia nga khlem ka jingartatien. Ki paidbah kila shaniah ia nga bad kila phai khmat ia nga. Ngan trei miet la bad sngi kumba nga trei ha Mawhati ha kine ki san snem bala leit lada nga shah jied kum u Nongmihkhmat jong ki”.
U Bah Dasakhiat Lamare ula pyndep hynne ka sngi thohdieng ia ka jingthep kyrteng kum u kyrtong ka NPP ban iakhun na Nongkrem Constituency bad la synran ia u da ki bahaiing, ki nongkyrshan bad ki nongkitkam ka NPP na Nongkrem.
Haba kylli, u Bah Dasakhiat ula ong “ Ka long kaba bakla shibun ba ki kynnoh ba nga pyndonkam da ka bor pisa ban thied ia u paidbah”.
“Haba ki Nongmihkhmat ki iarap ia ki paidbah hapoh ka Constituency, kane ka dei ka “Jingiarap”. Baroh ki Nongmihkhmat bad ki kyrtong ki don bad iarap iala ki jong ki briew..ban ong ba nga pynbiej ia ki paidbah da ka pisa ka long kaba bakla shibun bad ka dei ka bym dei ban kren” ula bynrap.
U Bah Dasakhiat ula ong “Ngim ju buh jingthoh haba ngi iarap ia ki paidbah bad ngi leh kat ka jinglah jong ngi kaba long da u pud” ong une u kyrtong ka NPP.
“Nga ju iarap beit ia ki paidbah bad ha kine ki san snem nga la iarap ia ki paidbah ym tang ha ka Mawhati constituency hynrei wat sha kiwei kiwei ruh lada ki wan wad jingiarap na nga. Kine kila mih namar bala jan ka elekshon hynrei nga ju iarap ia ki paidbah baroh san snem” ula ong.
U bah Dasakhiat ula ong ruh ba ka jingmih noh jong u na Mawhati ban iakhun noh na Nongkrem konstitwensi kadei hi naka bynta ka bha ka miat ki paidbah ka thain bad ka jylla baroh kawei namar wat u kyrtong ka NPP na Mawhati ruh udei u baha ing jong u, u ban trei naka bynta ka bha ka miat jong baroh.
