Nongstoiñ, Nailur 23: U Sordar ka shnong Nongsohpian, ula kyntu ia ka Sorkar Jylla ba kan plie noh ia ka Industrial Training Institute (ITI) kaba la shu sah iingjah naduh ba dep shna haduh mynta.
Kane ka Institute ka dei kaba don ha ka shnong Nongsohpian kaba jngai tang shi pda maw na ka surok National Highway 44(E) jong ka Shillong-Tura.
U Sordar Bah Sirian Wahlang ula ong ba naduh ba ka Sorkar kala pan jaka ban shna ia ka ITI, ka Shnong kala shah sngew bha da kaba khmih lynti ba ka jingdon jong ka Institute kan ai jingmyntoi ym tang ia ki samla kiba wan shah hikai ha kiba bun ki sap treikam hynrei kan long ruh kumjuh ia ki nongshongshnong ha kiba bun ki bynta.
Ula ong ba ka jingieh iingjah ia kane ka jingtei jong ka ITI kham ba ka don sha ka jaka ba kham kyndong na ka surok, ka lah ban long pynbna ka jaka rieh jong ki riew sniew ha ka por mynmiet.
Une u Sordar ula pynpaw ba ka ITI ka dei ka shlem kaban ai shibun ki jingmyntoi khamtam ia ki samla jong ki longiing ba duk, kiba la pule klas VIII haduh klas X bad ki bym don lad shuh ban leit bteng ia ka jingpule namar ka plie lad ia ki ban hikai pyntbit ha ki sap treikam bapher bapher ba kin kyrshan iala ka lawei bad ka Iing ka sem.
U Sorkar ula kyntu ba dei ban plie bad ban pynbit pynbiang noh ia baroh ki jingdonkam ha kane ka Institute khnang ba ki khun samla ka District kin ioh jingmyntoi.
 kaba la shu sah iingjah naduh ba dep shna haduh mynta.){kind=link}