Shillong, Rymphang 07: Namar ka jingpynpaw ki stad ki jhad ba kan don ka jingkyrduh um hapoh u snem 2040, u Myntri ka tnad Water Resources u Bah Comingone Ymbon ula kyntu iaki khynnah bad ki samla ba kidei ban shim smai ban pynlong ia ka pyrthei kaba bha nadong hadong (better planet) bad ban pynduna iaka jingpyndonkam ia ka um kaba shu pynkhuid na kaba lah dep pyndonkam (recycle) lem bad ban burom ia ki jingdon jingem.
U Myntri ula kren ia kane ha ka jingplie iaka International Water Conclave (IWC) kaba la long hynne ka sngi Balang ha State Convention Centre, Shillong.
Katba u Dr. Shakil P Ahammed, Additional Chief Secretary ka jylla ula kyntu ia ki samla ba kidei ban pdiang da ka mynsiem ban pynneh pynsah ia kamariang bad ia ki um ki wahbad ula banjur ia kaj ingdonkam ban shim ia ka jingkitkhlieh pateng la pateng bad ban leh ia ki kam kiban shngain naka bynta ki pateng ban dang wan.
Ula pynpaw ruh ba ki longshwa manshwa kila leh iaki kam ban pynneh pynsah ia ka um bad ia ka sawdong sawkun jong ka mariang, ia kaba baroh kiba don mynta ioh ban mad ia kine kiei kiei.
“Lada ngim iada ia ka pyrthei, lada ngim iada ia ka um, lada ngim iada ia ka mariang, ki pateng kiban wan kin mad shibun ki jingeh” ula maham.
“Ngi sngewthuh ia ka dor jong ka mariang. Lada ngi shim ia ka jingdon baroh jong ka um kaba don hapoh riIndia, ha u snem 2040 ka jingduna ka um kan long kumba 63 billion cubic metres bad kan don ka jingiapher hapdeng ka jingdawa bad ka jingioh” la ong u Ahammed.
Ha kane ka prokram, la pynlong ruh iaka jingiakob dro dur, ka jingkyntip bad ka jingiakob shondur da kaba buh ia ka mat ha kaba iadei bad ka jingpynneh pynsah ia ka um.
