Shillong Rymphang 07: Da kaba shim sa kawei sienjam ban pynurlong iaka jingthmu ban ym pyndonkam shuh ia ki kot ki sla hapoh ka iingdorbar thawain ka jylla, u Myntri Rangbah ka jylla u Conrad K Sangma yn wanrah iaka Mang Tyngka 2024-25 da kaba pyndonkam da ki kor teknoloji ne Digital ha ka Dorbar Mang Tyngka jong ka iing dorbar thawain ka jylla.
Kane kan long ruh kum ka jingplie iaka jingwanrah ia ka mang tyngka khlem da pyndonkam shuh ia ki kot ki sla.
Ia ka Budget Speech ne ka jingkren lamphrang halor ka mang tyngka yn ioh lyngba ka National eVidhan Application website: https://neva.gov.in/Home/NeVA bad ha ka Meghalaya Legislative Assembly website: https://megassembly.gov.in/.
Ki dkhot jong ka Meghalaya Legislative Assembly kin ioh ban khmih bad peit ia kane ka jingthoh ha ki Tablet kaba la pynkhreh ban ai sha ki hapoh ka iing dorbar.
Ki heh ophisar jong ka IT Cell ka Meghalaya Legislative Assembly Secretariat, kaba la ialam da u Computer Programmer u Bah Dapborlang Marwein, hynne ka sngi Balang kila ai jinghikai ia u Myntri Rangbah ka jylla u Conrad K Sangma halor ka jingpyndonkam iaka National eVidhan Application.
U Dr. Andrew Simons, Commissioner & Secretary jongka Meghalaya Legislative Assembly Secretariat, ula pynpaw ba kane ka sienjam kadei kaba iaid ryngkat bad ka jingthmu ban wanrah iaka jingkylla hapoh ka iing dorbar khlem da donkam shuh ban pyndonkam ia ki kot ki sla.
Ula pyntip ruh ba kila don katto katne ki jingpyrshang ban pynlong ia ka Assembly ka ban ym pyndonkam pura shuh ia ki kot ki sla.
Ha ka jingsdang ia katei ka Dorbar, ia ki kot ki sla kiba iadei bad ka sngi shong dorbar, ki jingkylli, ki Motion, Resolutions bad kiwei kiwei yn pynmih duna bha bad ia kine yn sa buh ha ka NeVA website bad ha ka website jongka the Meghalaya Legislative Assembly.
Ki nongthawaiñ kin sa ioh ia ka lad ban phah ia ki jingkylli ki jongki bad ia ki notis lyngba katei ka application bad kane ka App ka long kaba shngain naka bynta iwei pa iwei i dkhot jong ka iing dorbar.
