Shillong, Nailur 02 : U Myntri ka Tnad Social Welfare Bah Paul Lyngdoh ha ka sngi Ba-ar, ula kyntu ia ki Dorbar Shnong ban iatreilang bad ka Sorkar ha ka jingiakhun pyrshah ia u droks da kaba thaw ia ki Village Defence Party (VDP) hala ki jong ki shnong.
Haba kren sha ki nongthoh khubor, u Bah Paul ula ong ba ka Sorkar kala pynthymmai bad pynkiew ia ka jingiarap song pisa sha ki dkhot VDP kaba long na ka T.800 sha ka T.3000 shisnem.
Kat kum ka jingong jong u, ki dkhot VDP kin iarap ia ka Tnad Pulit da ki jingtip bad ki jingaiksai, khlem da donkam ban don ha surok baroh 24 kynta ha ka shisngi.
Hynrei u Myntri ula pynpaw ia ka jingsngewkhia bad wat hapdeng ki jingpyrshang jong ka Sorkar, ki dang don tang 11 tylli ki VDP ha Shillong, ka Sor kaba don ia u paid nongshongshnong ba palat 6 lak ngut.
“Nga la iakren bad ki Dorbar Shnong ha ka jingialang ha NEC Building, Nongrim Hills, ha kaba bun ki Dorbar Shnong kiba heh ka Shillong, kila wan ban iashimbynta bad ngi la kyntu ia ki ban shim ia ka VDP scheme naba ki VDP ki dei kiba la ithuh da ka ain bad kaba aibor bad jingiada ia ki da ka ain bad ki treikam ruh ha ryngkat bad ka Tnad Pulit” ula ong.
“Nga kyntu ia ki Dorbar Shnong ba kin wan shakhmat ban shim kabu ia ka jingtyrwa jong ka Sorkar Jylla namar kane kam dei ka jingialeh pyrshah hapdeng ka Sorkar bad u paidbah, kane ka jingiatrei lang u paidbah bad ngi ban iakhun ia u droks” bynrap u Bah Paul.
Nalor kane, u Myntri u pyntip ba hynriew ngut ki nongkhaii droks bala ioh kem bun sien, la dep set ia ki hapoh ka PITNDPS na ka bynta shisnem, kaba lah ban pynjlan lada shem ba ki dang iai leh ia kane ka kam bymman.
Ka Sorkar kala ai khusnam song pisa ruh sha ki Pulit bad volunteer ka ANTF, haba ai jingithuh ia ka jingtrei shitom jong ki ban iakhun pyrshah ia ka kam khaii droks.
“Dang shen, nga la leit iuhkjat hapoh ka Ophis ka ANTF bad ngi la air uh ia ka song pisa sha ki dkhot ba long mar T. 10,000, ka bym pat ju leh ha ki snem bala leit. Kine ki dei ki kam kiba khraw bha” ula ong.
 hala ki jong ki shnong.){kind=link}