Shillong, Iaiong 28: U Myntri ka tnad Bording u AT Mondal ula leit iashimbynta ha ka Regional Power Minister’ Conference kaba la long ha Gangtok, Sikkim ha kaba ula kyntu ia u Myntri ka Sorkar Pdeng ban shimkhia lem ia ki jingeh kiba mad da ka jylla ha kaba iadei bad ka kam pynmih bording.
Ha kane ka jingialang la leit ruh ban mihkhmat lang ia ka jylla da u Director (Distribution) ka MePDCL.
Ha kaba iadei bad ka jingthmu ban ai NOC da ka jylla Meghalaya ban tei ia ka Pump Storage Projects (PSP), u A.T. Mondal ula pynpaw ia ka jingsngewkhia halor kane ka mat ba katei ka jingtyrwa da ka MoP lyngba ka NPTC ban tei ia ka PSP kam long kaba iahap hapoh ka jylla Meghalaya.
U A.T. Mondal ula pynsngew ha u Myntri ka Sorkar Pdeng, ba ka jylla kadei ban don ka jingiohnong kum ha kaba iadei bad ki Hydel Power Project. Ka jingsngewkhia jong ka jylla kadei kaba la pynpaw la bunsien hynrei kam shym la don kano kano ruh ka jingioh ia ka jubab.
U Myntri ka Sorkar Pdeng ula pynthikna ba ka Ministry kan shimkhia ia ka kam na ka bynta ban buh ia ki kyndon ki ban iarap ia ka jylla bad ia ka CPSU. La kyntu ruh ia ka Sorkar Meghalaya ba kan wad ia ki lad ki lynti na ka bynta ban tei ruh ia ka Solar Power Plant.
U Mondal ula kyntu ruh ia u Myntri ka tnad Bording ba ka Meghalaya ka don ia ka kabu kaba biang bha ban leh ia ki Hydro Power Project. Ban tei ia ki Hydro Power Plant ki barit, kumta ka long kaba kongsan ban ioh ia ka jingiarap. Ia kane ka mat lah iatai sani bha bad u Myntri ka Sorkar Pdeng ula bthah ia baroh ki ophisar jong ka Ministry ban shimkhia ban pynbeit ia kane ka kam.
Nalor kane, u Mondal ula pynsngew ruh ha ka jingialang ba watla ka jylla Meghalaya ka iengskhem ha kaban don ia ka Plan kaban treikam pura ban pynthikna ba kan ym don ka jingduhnong ia ka jingkit ha kano kano ka por, hynrei ka jylla kala shem pat ba ka Final Resource Adequacy Plan kaba la pynkhreh da ka CEA bad la pynpaw ruh ia ka jingsngewkhia hakhmat jong ka CEA bad haduh mynta ki dang ap ban ioh ia ka jubab na ka CEA. U Myntri ka Sorkar Pdeng ula pynthikna ba yn sa shimkhia noh mardor halor kane ka mat.
Ha kaba iadei bad ka jingpynkiew ia ka ‘Transmission Capacity’ jong ka jylla, ban pynkhlain ia ka ‘Transmission Capacity’ ia ka jylla ban lah ban pyndap pynbiang ia ka jingkiew ha ka jingpyndonkam ia ka bording, ka Tnad Bording jong ka Sorkar India ka lah ban sdang noh ia ka scheme kum ka NERSIP ban kyntiew noh ia ka Transmission Capacity ha baroh ki jylla jong ka thain shatei lam mihngi.
Ula pyntip ruh ha ka jingialang ba ka rukom pynmih ia ka bording hapoh Meghalaya kala nang kham bha ha kine ki 5 snem kiba la dep, ha kaba ka jylla Meghalaya kala nang kham bha ha ka rukom ai ia ka Bill bad ia ka jinglum jong ka MePDCL bad kumjuh ruh kala hiar bha ka jingduhnong ne AT&C loss na ka 32% ha u 2019 sha ka 17% ha u 2024.
U Mondal ula ai khublei ia u Myntri ka tnad Bording jong ka Sorkar Pdeng halor ka jingbhah shuh shuh ban pynbiang ia ka bording elektrik ha ki iing ki sem bad kane ka kam kan sa sdang noh shen.
